ASNN – Ish-gardiani i 2 korrikut në Kosovë, Etrit Berisha, i cili tanimë luan për Atalantën, si i huazuar nga Lacion, i cili, i intervistuar nga e përditshmja e mirënjohur sportive italiane, “Gazzetta Dello Sport”, zbulon se, pas mbërritjes në Itali hoqi dorë nga ekzekutimi i 11-metërshave, një specialitet që e perfeksionoi gjatë periudhës kur ishte pjesë e Kalmarit në Suedi. Më pas, ndalet edhe tek modeli sportiv që ka ndjekur, por edhe te hapat e parë të karrierës së tij që premton.
“Kam ndjekur Van De Sarin, një portier i gjatë, me reflekse, i shpejtë dhe i zoti me këmbët, – ka rrëfyer ai. – Sidoqoftë, në moshën 8 vjeçare nisa të luaja si mbrojtës i majtë me skuadrën e “2 Korrikut”, por më pas një portier mungoi në stërvitje dhe m’u desh të vendosesha në portë. Që nga ai moment nuk lëviza më.” Berisha është pyetur edhe nëse në mendjen e tij ka kaluar ndonjëherë ideja për t’u bashkuar me Kosovën, por në këtë pikë ai është i qartë.
“Jo sepse nuk bëj dallime, ndihem kosovar dhe shqiptar në të njëjtën kohë, – ka vijuar portieri kuqezi. – Është e vërtetë që më ka ardhur një propozim edhe nga federata suedeze.” Gardiani shqiptar ndalet më pas te ecuria me kombëtaren dhe pengu i kartonit të kuq ndaj Izraelit që do ta detyrojë të mungojë në përballje me Italinë në fushën e kësaj të fundit. “Kam një zemërim të brendshëm që nuk mund ta imagjinoni sepse e prisja këtë moment që kur u hodh shorti”, – ka thënë Berisha.
“Zahavi bëri një gjest teatral por herën tjetër do të mendohem dy herë përpara se të reagoj, – ka premtuar portieri kuqezi i Atalantës. – Në këtë moment, shpresat e kualifikimit në Botëror janë të pakta. Humbja ndaj Izraelit ishte e rëndë dhe na detyron të mendojmë për të mundur Italinë. Kujtimi më i bukur nga Evropiani? Tifozët tanë që na mbështetën me krenari dhe pasion. Shumë njerëz erdhën edhe nga Kosova edhe pse gjithçka shkoi keq, sepse me Zvicrën nuk e merituam humbjen, ndërsa me Francën paguam mungesën e përvojës”.
