ASNN – Sulmuesi i Kombëtares Bekim Balaj, mendon se Skënderbeu ka shanse të mira për t’u kualifikuar përballë Dinamos së Zagrebit. Sot Rijeka e dy futbollistëve tanë Balajt dhe Roshit, do të jetë përballë Dinamos së Zagrebit, ndeshje kjo që do të jetë një mundësi e që korçarët të vëzhgojnë kroatët.
Sipas sulmuesit Balajt, presidenti i kroatëve është në burg dhe për rrjedhojë skuadra Dinamo e Zagrebit këto kohët e fundit ka luhatje në rezultatet e veta. “Dinamo e Zagrebit njihet se kush është, – ka thënë ai. – Është një klub model për rezultatet dhe për rritjen e talenteve.”
“Është një skuadër me talente, Ademi është kapiteni i tyre, – ka vijuar shkodrani. – Kanë lojtar si Henrikez, Sudani, Pjata. Dinamo e Zagrebit është skuadër që për biznes është me laps e letër. Megjithatë, pavarësisht këtyre, unë mendoj se Skënderbeu ka shanse edhe mund t’ia dalë të jetë në grupet e Ligës së Kampioneve”.
