ASNN – Zërat që qarkullonin gjatë dy-tre ditëve të fundit, tanimë janë konfirmuar. Armando Sadiku është zyrtarisht lojtar i Luganos në Superligën e Zvicrës. Sulmuesi i kombëtare shqiptare është transferuar nga FC Zyrihu tek kjo skuadër në formë huazimi deri në përfundim të sezonit. Marrëveshja përfundimtare mes palëve u arrit paraditen e kësaj të shtune, me hedhjen e firmës.
25-vjeçari kthehet kështu te skuadra ku shënoi 24 gola në 43 ndeshje për një sezon e gjysmë nga korriku i 2012-ës deri në janar të 2014-ës në nivelin e dytë të kampionatit zviceran të futbollit, që njihet si “Çellenxh Ligë”. Tek Lugano, shqiptari do të jetë nën urdhërat e trajnerit Paolo Tramexani.
Ky i fundit ishte ndihmësi i Xhovani De Biazit në Kombëtaren shqiptar dhe pikërisht në dhjetor mori zyrtarisht drejtimin e skuadrës jugore të Zvicrës. Ishte këmbëngulja e Tramexanit që ndikoi në arritjen e marrëveshjes me dy klubeve, pasi për sulmuesit shqiptar në ditët e fundit të 2016-ës këmbënguli edhe Vaduzi.
Por, siç duket, pa mundur ta mposhtë rivalitetin e Luganos. FC Zyrihu pranoi ta huazonte Sadikun për faktin se kryeson Çellenxh Ligën me 12 pikë më shumë se Ksamaksi i Nojshatelit, çka do të thotë se rikthimi në elitën e futbollit zviceran për këtë skuadër mbetet formalitet.
Gjatë pjesës së parë të këtij sezoni, Sadiku u aktivizua në 9 ndeshje, duke shënuar 5 gola, por për shkak të pranisë së disa sulmuesve cilësorë në skuadër, drejtuesit e Zyrihut pranuan ta huazonin te Lugano. Sadiku ishte shënuesi i golit historik të Shqipërinë në Evropianin e 2016-ës në Francë.
