ASNN – Mbrojtësi i Kombëtares shqiptare, Andi Lila, është tashme në kërkim të një ekipi të ri, pas largimit nga Seria A, ku luante me Parmën. Duke qenë pa një skuadër, Lila u ka kërkuar drejtuesve të Skënderbeut që të stërvitet përkohësisht me ta dhe korçarët për të mos humbur formën e tij fizike. Një kërkesë kjo që është pranuar menjëherë nga lojtarët e ekipit “kampion” të Shqipërisë.
“Në pritje të skuadrës së re po stërvitem me Skënderbeun. Falenderoj çunat për mikpritjen”, ka shkruar Lila në profilin e tij në rrjetin social “Instagram”. Duhet kujtuar se të njëjtën ka gjë ka bërë edhe Hamdi Salihi, i cili iu bashkua kampionëve, pra vetëm për stërvitje, por në fund arriti akordin për të luajtur me ta në ndeshjet e Ligës së Kampioneve.
Duke parë se Lila është një futbollist i lirë, nuk përjashtohet mundësia që ai t’i bashkohet ekipit korçar për ndeshjen e radhës në “play-off” përballë Dinamos së Zagrebit. Edhe trajneri i Kombëtares, Xhovani De Biazi e ka mbështetur bashkimin e mbrojtësit Lila me Skënderbeun, ndaj dhe nuk përjashtohet mundësia që ai t’i bashkohet ekipit korçar për ndeshjet e radhës.
“Andi Lila te Skënderbeu? “Kurrë, mos thuaj kurrë”! Është një mësim i jetës, që nuk duhet harruar”, – ka thënë De Biazi. Drejtuesi e kampionëve, presidenti Takaj dhe trajneri Josa, prej kohësh janë vënë në kërkim të një mbrojtësi cilësor për Skënderbeun. Dëmtimi i Osmanit dhe pezullimi i Arapit 3 ndeshje nga UEFA, pas marrjes së kartonit të kuq ndaj Krusejdërs, e kanë vënë në gjendje emergjence skuadrën korçare.
“Kam mësuar se Skënderbeu do ta forcojë ekipin, synon të marrë Andi Lilën, ish-lojtarin e Parmës, i cili është një futbollist i lirë dhe në vitet më të mira të karrierës, 29 vjeç. Nëse ata duan të kenë sukses, ky përforcim do të jetë një aset i fuqishëm i Skënderbeut kundër Dinamos,” citohet të ketë thënë trajneri i Kombëtares sonë Xhani De Biazi, sipas gazetës kroate “Jutarnji List”.
Në një shkrim të sajin sot, e përditshmja e mirënjohur kroate paralajmëron Dinamon për forcën e Skënderbeut. Duhet të presim ditët në vijim për të parë nëse Lila do të zgjedhe Skënderbeun, apo do të shikojë përtej Shqipërisë.
