ASNN – Lojtari i Kombëtares Shqiptare, Andi Lila është rikthyer tek skuadra e PAS Janinës. Kavajasi u bashkua me ekipin grek duke i dhënë fund sagës së gjatë në kërkim të një skuadre pas largimit nga Parma, klub që falimentoi duke larguar gjithë organikën e sezonit të kaluar.
“PAS Janina njofton rikthimin e lojtarit Andi Lila pas një aventure që mesfushori kaloi te Parma gjatë muajve të fundit”, – theksohet në deklaratën zyrtare të klubit grek, ku vetë 29-vjeçari shprehet i lumtur për rikthimin në ekip. “Jam shumë i lumtur që pas shumë muajve u riktheva sërish në shtëpinë time”, – ka thënë ai.
“Po pres me padurim për të nisur stërvitjen me shokët e skuadrës dhe për ta ndihmuar skuadrën gjatë këtij sezoni për t’u ngjitur sa më lart në klasifikim”, – ka shtuar ish-lojtari i Parmës. “Gazzetta.gr” thekson se rikthimi i Andi Lilës është një lajm shumë i mirë për ekipin e Janinës që sezonin e shkuar e mbylli në vendin e 6-të të renditjes.
Me skuadrën e Parmës, Lila regjistroi 11 ndeshje me dy gola të shënuar. 5 muajt e aventurës së tij në Serie A shoqëruan nga disa dëmtime që kushtëzuan paraqitjet e tij me ekipin emiljan që në fund të sezonit ra në Serie B, por pas shpalljes së falimentimit u detyrua ta nisë sezonin disa kategori më poshtë.
