Bëjnë detyrën, vlen goli i Kuçarçik për polakët. Vendësit nuk janë lodhur shumë në ndeshjen e kthimit, ndërsa kanë qenë me mendjen tek kampionati, kurse “Play-off”-in e Ligës së Evropës e kishin futur në xhep që në Tiranë

Legia Varshavë – Kukësi                1-0

Shënues: Kuçarçik 47’

Legia Varshavë: Kuçiak, Pazdan (Makovski 61’), Levçuk, Brzhiski, Berezinjski, Rzhezniçak, Duda, Zyro (Guilherme 45’+2), Furman, Kuçarçik (Bartzhak 68’), Prjoviç. Trajner: H. Berg

Kukësi: Koçi, Mici, Hallaçi, Malota, Hasani (Halili 50’), Birungueta, Felipe Moreira (Qafa 90’+2), Zhan Karioka (Shameti 83’), Musolli, Muça, Erik Flores. Trajner: M.Troisi

Gjyqtarë: T. Shapron, N. Danos, A. Viala (Francë)

Kartonë të verdhë: Berezinski, Furman / Birungueta

Minuta e golit:

47’ Legia e Varshavës ka kaluar në avantazh me anë të Kuçarçik duke e mbyllur kështu çështjen e kalimit në fazën Play-off të Ligës së Evropës. Kuçarçik ka shfrytëzuar maksimalisht pasimin e Dudës. (1-0)

Minutat e tjera:

6’ Aksioni i parë i rrezikshëm ka ardhur nga vendësit, ndërsa ka goditur pikërisht futbollisti, i cili prishi të gjithë ndeshjen e parë në “Qemal Stafa”. Pikërisht Duda, por jashtë kuadratit të portës së mbrojtur nga Koçi.

18’ Tjetër moment i rrezikshëm në portën kuksiane, por Kuçarçik ka gjuajtur jashtë kuadratit të portës së mbrojtur nga Koçi dhe goditje fundore për verilindorët.

21’ Goditje këndi për Legian e Varshavës, ka krosuar Furman, Rzhezniçak ka gjuajtur jashtë portës së mbrojtur nga Koçi. Largohet dhe ky rrezik nga porta e verilindorëve.

31’ Goditje këndi për Kukësin, Flores ka krosuar nga këndi, Birungueta ka gjuajtur me kokë, por Kuçiak ka pritur dhe polakët shpëtojnë nga pësimi i golit.

40’ Tenton përsëri Kukësi të befasojë skuadrën polake, ndërsa ka gjuajtur Karioka, por jashtë kuadratit të portës së mbrojtur nga Kuçiak.

41’ Legia i afrohet golit, ka gjuajtur Duda, Koçi ka grushtuar për një çast, por nuk e ka bllokuar plotësisht topin. Ndërhyn Brzhiski, i cili për fatin e mirë të verilindorëve gjuan jashtë.

45’+3 Në fundin e pjesës së parë verilindorët nuk kanë hequr dorë nga rrezikimi në portën polake. Godet Hasani, por jashtë portës së mbrojtur nga Kuçiak.

55’ Goditje dënimi për Legian, gjuan Brzhinski, por mbi traun e portës së mbrojtur nga Koçi dhe verilindorët shpëtojnë nga pësimi i golit të dytë.

57’ Kundërsulm i shpejtë i Legias, ka goditur brenda zonës së rreptësisë kuksiane Prijoviç, por jashtë kuadratit të portës së mbrojtur nga Koçi.

61’ Kukësi tenton të barazojë, ka gjuajtur brenda zonës së rreptësisë polake Moreira, por jashtë kuadratit të portës së mbrojtur nga Kuçiak

68’ Kuçarçik rrezikon portën e Kukësit, ka gjuajtur, por Koçi i ndodhur në pozicion ka pritur dhe ka shpëtuar portën e verilindorëve nga pësimi i golit të dytë.

72’ Këmbëngul Legia me anë të Guilhermes, por gjuajtja e tij ka qenë e gabuar dhe ka përfunduar jashtë kuadratit të portës së mbrojtur nga Koçi.

75’ Kukësi pranë golit të barazimit, ka goditur Karioka, por ka pritur Kuçiak.

79’ Polakët pranë golit të dytë, ka gjuajtur Brzhiski, por ka pritur Koçi.

90’ Guilherme i afrohet golit të shënimit në portën kuksiane, godet, por ka pritur Koçi.