ASNN – Java e 31-të e Kategorisë Superiore të Kampionatit Kombëtar të Futbollit ka nisur sot me fitoren e Laçit. Skuadra kurbinase i shtoi kështu një tjetër sukses ecurisë së saj pozitive të sezonit, duke mundur me rezultatin 1-0 Teutën. Ndeshja e parë e kësaj jave u vendos nga goli i Shetës.
Mbrojtësi shënoi pas një ore lojë, duke i dhënë një fitore të rëndësishme Laçit, që ngjitet në kuotën e 57 pikëve në tabelën e renditjes. Ndeshjet e tjera të javës së 31-të të Kategorisë Superiore do të luhen të shtunën. Takimi midis Laçit dhe Teutës nisi me një epërsi të lehtë të kurbinasve.
Gjatë 45 minutave të para, skuadra e trajnerit Armando Cungut e ka administruar lojën, duke u përpjekur herë pas here të rrezikonte portën e Rizvanit. Por, nga ana tjetër, Teuta u mbrojt mjaft mirë në këtë pjesë të parë duke u përpjekur të dalë përpara me kundërsulme.
Në minutën e fundit, Çota kishte një shans ideal për të kaluar durrsakët në epërsi, por e shkoi atë dëm dhe me rrjeta të paprekura do të mbyllet pjesa e parë të këtij takimi. Në 45 minutat e dyta kurbinasit futen në fushë me një tjetër mentalitet dhe ritin edhe më shumë presionin drejt portës së Rizvanit.
Pavarësisht qarkullimit të topit dhe kërcënimeve nga ana e laçianëve, goli erdhi falë një episodi në minutën e 60-të dhe mban firmën e mbrojtësit Sheta. Goditje dënimi në krahun e majtë dhe Sheta përfiton nga harkimi i Veliajt dhe një ngatërrese mes mbrojtësve, duke dalë i vetëm përballë Rizvanit duke e dërguar topin drejt rrjetës.
Laçi kalon kështu në epërsi 1-0 dhe fiton qetësinë duke administruar më lehtësisht lojën. Ndeshja mbyllet me këtë fitore minimale të kurbinasve, që tashmë e shohin veten në kuotën e 57 pikëve, 2 më pak se Partizani i vendit të katërt dhe 3 më pak se Tirana e vendit të tretë. Pas kësaj humbjeje, durrsakët mbeten në kuotën 26 pikëve.
Kategoria Superiore
Java e 31-të:
Të premten, 17 prill 2015:
Laçi – Teuta 1-0
Shënues: Sheta 60’
Stadiumi i Laçit
Të shtunën, 18 prill 2015:
Elbasani – Tirana ora 14:00
Stadiumi “Elbasan Arena”, Elbasan
Vllaznia – Flamurtari ora 14:00
Stadiumi “Loro Boriçi”, Shkodër
Partizani – Kukësi ora 17:00
Stadiumi Kombëtar “Qemal Stafa”, Tiranë
Skënderbeu – Apolonia ora 17:00
Stadiumi “Skënderbeu”, Korçë
Renditja
Nr. Skuadra N. F. B. H. Gsh-Gp Pikë
- Skënderbeu 30 19 6 5 48-16 63
- Kukësi 30 19 5 6 47-20 62
- Tirana 30 18 6 6 39-20 60
- Partizani 30 18 5 7 33-21 59
- Laçi 31 16 9 6 37-16 57
- Flamurtari 30 9 7 14 24-28 34
- Vllaznia 30 11 3 16 25-33 33
- Teuta 31 8 2 21 26-45 26
- Apolonia 30 5 4 21 11-47 19
10. Elbasani 30 4 1 25 15-59 13
