ASNN – Mundet 0-3 në Stadiumin “Elbasan Arena” në duelin e parë të turit të 3-t të Ligës së Konferencës. Laçi është mundur 0-3 përballë Anderlehtit në takimin e parë të turit të 3-të të Ligës së Konferencës. Ndeshja, që është luajtur në Stadiumin “Elbasan Arena” dhe është sjellë për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH 1.
Dy skuadrat shqiptare që kanë mbetur në garë në veprimtarinë e 3-të të klubeve të kontinentit, Ligës së Konferencës, kanë zhvilluar të enjten ndeshjet e para të turit të 3-të dhe skuadra e parë që ka zbritur në fushën e blertë ka qenë Laçi. Skuadra kurbinase ka pritur në takimin e parë gjiganten belge, Anderlehtin, ndërsa ndeshja është luajtur në Stadiumin “Elbasan Arena” dhe është sjellë për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH 1.
Qëndresa e skuadrës laçiane do të marrë fund pas 27 minutash lojë, kur Delkrua do të kalojë belgët në epërsi. Tri minuta para fundit të pjesës së parë, Laçi merr një tjetër goditje, pasi Anderlehti gjen edhe golin e dytë. Me këtë epërsi dygolëshe të belgëve do të mbyllen 45-minutat e para, ndërsa ato të dytat do të shohin kurbinasit e drejtuar nga trajnerit Shpëtim Duro, të përpiqen, por janë miqtë që gjejnë edhe një gol të 3-të me anë të Rafaelovit.
Përtej administrimit të lojës nga skuadra mike, Laçi do të kërkojë të paktën një gol dhe vetëm portieri belg do t’ia mohojë atë Prengës 3 minuta para fundit. Mbyllet me humbjen 0-3 kjo ndeshje e parë e skuadrës kurbinase në fushën e vet përballë Anderlehtit dhe skuadra shqiptare ka një mision thuajse të pamundur për ndeshjen e kthimit pas një jave në Belgikë.
