ASNN – Veprimtaria e dytë e futbollit në vend, Kupa e Shqipërisë, ka zhvilluar të premten finalen e edicionit të saj të 63-të, duke kurorëzuar Laçin si fituese të saj për herë të dytë në këto 3 sezonet e fundit. Bashkë me këtë trofe, kurbinasit sigurojnë edhe vendin në turet eliminatore të Ligës së Evropës dhe duke lënë kështu duarboshe Tiranën, që kishte shpresuar tek një triumf i Kukësit.
Sikundër çdo veprimtari madhore, edhe finalja e Kupës së Shqipërisë u soll për sportdashësit drejtpërdrejt nga Rrjeti i Radio-Televizionit Shqiptar. Kupa e Shqipërisë ka shpallur të premten në mbrëmje Laçin si fituese të edicionit të saj të 63-të, pasi kurbinasit kanë mundur Kukësin me rezultatin 2-1, duke siguruar bashkë me të edhe vendin në turet eliminatore të Ligës së Evropës dhe duke lënë kështu duarboshe Tiranën, që kishte shpresuar tek një triumf i Kukësit.
Pjesa e parë e këtij takimi ka nisur premtuese, me Kukën më të zhvendosur në gjysmëfushën kundërshtare, nga njëra anë, por me Laçin mjaft të rrezikshëm në kundërsulm dhe vetëm reflekset e portierit Halilaj i kanë mohuar golin kurbinasve në një rast të pastër të minutave të para. Megjithatë, laçjanët do ta gjejnë golin në minutën e 29-të, kur Veliaj do të ekzekutojë mjeshtërisht një goditje të lirë dhe do të përshëndesë rrjetën e portës kukësjane.
Por atëherë kur mendohej se 45 minutat e para do të mbylleshin me epërsinë njëgolëshe të kurbinasve, Kukësi do të barazojë shifrat pikërisht në fundin e pjesë së parë, falë një goditjeje të bukur nga larg të Hasanit. Të dyja skuadrat do të shkojnë në dhomat e zhveshjeve me këtë barazim 1-1, ndërsa pjesa e dytë i sheh të dyja skuadrat më të kujdesshme në lojën e tyre.
Megjithatë, një tjetër goditje e lirë në kufinjtë e zonës së verilindorëve dhe një skemë e zgjuar, e interpretuar saktësisht, u ka dhënë mundësi laçjanëve të gjejnë epërsinë, me një finalizim të saktë të Xhejmsit. Minutat e mbetura do të shohin Laçin të administrojë epërsinë, ndërsa Kukësin të paqartë në përpjekjet për të mbërritur te porta kundërshtare.
Madje, edhe kur e godet portën, është Vujadinoviç që nuk lejon prekjen e rrjetës. Përfundimisht, Laçi fiton me rezultatin 2-1, duke fituar për herë të dytë në këto 3 sezonet e fundit, trofeun e dytë të futbollit në vend, Kupën e Shqipërisë. Ndërsa Kukësi vajton një tjetër finale të humbur, e dyta radhazi, në një sezon ku edhe në kampionat u detyrua të kënaqej me vendin e dytë.
