AlbanianSport.com 07/08/2018 23:55
ASNN – Pas përfundimit të aventurës evropiane, Laçi përfitoi disa ditë pushimi dhe tanimë ka nisur punën për sezonin e ri. Dhe sezoni i ri ka nisur me emërimin e trajnerit të ri, që do të jetë Artan Merxhushi. Një gjë të tillë trajneri 50-vjeçar e ka pohuar vetë për Rrjetin e Radio-Televizionit Shqiptar.
I kontaktuar paradreke nëpërmjet linjës telefonike, Merxhushi ka sqaruar se kanë mbetur vetëm disa hollësi për t’u sqaruar, por tanimë është zyrtare që do ta marrë ai drejtimin e skuadrës kurbinase për sezonin e ri. Pas largimit të trajnerit Besnik Prenga, në përfundim të katër ndeshjeve në Ligën e Europës, klubi ishte vënë në kërkim të një trajneri të ri.
Kjo edhe për arsye se, për Laçin sezonin i ri nis shumë më shpejt, me duelin e Superkupës, që do ta luajë më 12 gusht ndaj Skënderbeut. Sa i përket trajnerit, para zyrtarizimit të Merxhyshit ishin lakuar shumë emra, ku mes tyre është përfolur edhe ish-trajneri i Kukësit dhe Bylisit, Naxhi Shensoj.
Përveç kësaj, përpos të larguarve në përfundim të sezonit të shkuar, Laçi mund të humbasë edhe shërbimet e Myrto Uzunit dhe kapitenit Gentjan Selmani, të cilët parashikohet të nisin një aventurë jashtë vendit. Trajneri Artan Merxhyshi ka eksperiencë të madhe në Superiore, pasi ka drejtuar ekipe si Dinamo, Besa, Kastrioti, Apolonia, Bylis dhe Korabi.
Tashmë, 50-vjeçarin do ta shohim në krye të stolit të Laçit. Laska ka përzgjedhur Mërgjyshin, pasi ky i fundit njeh mirë dhe sektorin e të rinjve.