ASNN – Spikat Uest Hem-Mançester Siti dhe 4 duele të tjera të Premieri Ligës, gjithçka në Rrjetin e RTSH-së. Veprimtaria e 3-të e futbollit anglez, Kupa e Ligës Angleze, ka hedhur edhe shortin e turit të 16-shes, duke ofruar disa dueleve intriguese. Pas 10 ndeshjeve të para, të luajtura të martën, kjo veprimtari, që është një tjetër ekskluzivitet i Rrjetit të Radio-Televizionit Shqiptar, ka vijuar të mërkurën me 6 ndeshjet e tjera të turit të 32-shes. Dhe, ndërsa pati sjellë të martën dy prej sfidave më të spikatura, transmetuesi publik ka vijuar të sjellë për sportdashësit 3 sfida prej sfidave të së mërkurës.

Kështu, në RTSH Sport ka ardhur drejtpërdrejt për sportdashësit superdueli Mançester Junajtid-Uest Hem, në RTSH 2 një tjetër duel interesant, siç ishte ai midis Vulverhempton Uondërërs dhe Totenhemit, ndërsa në RTSH 1 përballja Çellsi-Aston Vila. Dhe në mbyllje të këtyre dueleve janë njohur edhe 16 skuadrat që vijojnë më tej, të cilat kanë njohur edhe kundërshtaret e radhës. E ndërkohë që Mançester Junajtid u eliminua përballë Uest Hemit, vijoi për më tej skuadra tjetër e qytetit, Mançester Siti, që është edhe fituese e 4 edicioneve të fundit dhe, që, për më tepër, nuk njeh humbje në këtë veprimtari që nga tetori i 2016-ës.

Dhe nga 8 përballjet e turit të 16-shes, 5 prej tyre janë duele midis skuadrave të Premier Ligës angleze e midis tyre spikat dueli midis Mançester Sitit dhe Uest Hemit. 4 duelet e tjera janë Çellsi-Sauthempton, Arsenal-Lids, Leister Siti-Brajton & Houv Albion dhe Burnli-Totenhem. Në çiftet e tjera, dy skuadrat e nivelit të dytë të futbollit anglez, që njihet si “Çempionshipi”, Stouk Siti dhe Preston North End, sfidojnë përkatësisht dy skuadra e Premier Ligës, Brentfordin dhe Liverpulin. Ndërkaq, QPR-ja e Çempionshipit duket se ka një sfidë më të favorshme përballë Sanderlendit, që hëpërhë militon në nivelin e 3-të të futbollit anglez, në Ligën 1.

Kjo garanton në të njëjtën kohë se në çerekfinale do të jetë të paktën një skuadër që nuk është nga Premier Liga. Ndeshjet e turit të 16-shes së Kupës së Ligës Angleze do të luhen përgjatë mesjavës së 26-27 tetorit.

Kupa e Ligës Angleze

Shorti i turit të 16-shes:

Çellsi – Sauthempton

Arsenal – Lids

Stouk Siti – Brentford

Uest Hem – Mançester Siti

Leister Siti – Brajton & Houv Albion

Bërnli-Totenhem

QPR – Sandërlend

Preston North End – Liverpul

Ndeshjet do të luhen përgjatë mesjavës së 26-27 tetorit 2021.