ASNN – Kukësi ka mbyllur fazën përgatitore në Turqi, duke dëshmuar seriozitet, përkushtim, cilësi dhe natyrisht rritje pretendimesh për titullin këtë edicion. Skuadra është në formë dhe, për momentin, epërsia është se nuk ka asnjë dëmtim dhe grupi ka punuar mirë edhe në skemat taktike, dëshmuar në miqësoret që zhvilloi në Antalja me lojë cilësore dhe rezultate të pranueshme. Kapiteni i skuadrës verilindore, Ylli Shameti, ka bërë një përmbledhje të punës së bërë në fazën përgatitore, lëshon sfidën ndaj rivalëve duke e llogaritur Kukësin pretendent për titull, teksa përjashton në mënyrë kategorike se ka çështje “Rexhinaldo”.
“Faza në Turqi shkoi shumë mirë, – rrëfen ai, – nuk patëm dëmtime dhe luajtëm miqësore me ekipe shumë të forta që kanë yje në gjirin e vet. Normalisht që miqësoret nuk janë si ndeshjet zyrtare, por ne i vlerësojmë shumë takime të atilla dhe shpresoj të na ndihmojnë shumë për pjesën e mbetur të garës dhe realizimin e synimeve tona.” Më pas Shameti thotë se dy afrimet që ka bërë Kukësi janë goditje dhe do të përshtaten mirë. “Normalisht, çdo futbollist kur ndërron klimë e ka pak të vështirë, – vijon kapiteni i skuadrës verilindore. – Megjithatë fakti që si Rroca ashtu edhe Shkurtaj janë shqiptarë do t’ia bëjë më të lehtë.”
“Aq më tepër që edhe mjedisi te Kukësi është shumë pozitiv”, – shtoi Shameti. Më tej komentohet çështja e mprehtë e sulmuesit mozambikas, Rexhinaldo. “Nuk ka çështje, konkurrenca është rritur me ardhjen e Shkurtajt dhe normalisht më vjen mirë mua si lojtar me përvojë që Kukësi ka cilësi dhe askush nuk e do stolin, – thotë mbrojtësi i verilindorëve. – Kjo tregon se jemi një ekip me nivel të lartë. Ai ka bërë fazë shumë të mirë dhe mendoj se bashkë me Shkurtajn do të jenë dy lojtarë shumë të mirë, në të mirë të ekipit”. Shameti nuk la jashtë vëmendjes as lëvizjet në merkato që ka bërë Kukësi.
“Ndonjëherë të kthehen edhe kundër afrimet e janarit dhe dalin blof, – pohon gjirokastriti i Kukësit. – Kështu që nëse ka një lojtar që presidenti dhe trajneri e mendojnë si të dobishëm, atëherë i shprehim mirëseardhjen. Të gjithë lojtarët që kanë ardhur dhe ata që do vijnë, duhet të dinë se po shkojnë te Kukësi. Po të jesh lart, edhe presioni është shumë i madh. Ndaj edhe ata duhet të dijnë që ne kemi një president shumë korrekt, por edhe shumë kërkues. Në dy fazat e para kemi bërë shumë gabime, por kemi rikuperuar dhe tashmë jemi në rrugë të mbarë për titullin edhe pse nuk mohohet se ka konkurrencë.”
Në fund kapiteni i Kukësit sqaron se rinovimi me ekipin verilindor nuk përbën kurrfarë çështje dhe se kjo gjë do të vijë në kohën e duhur. “Mendoj se duhet parë hap pas hapi. Aktualisht nuk përbën një çështje për mua rinovimi”, – përfundoi rrëfimin e tij mbrojtësi dhe njëherësh kapiteni i Kukësit, Ylli Shameti.
