ASNN – Përtej shtyrjes me një javë të kampionatit, faza përgatitore për skuadrat e Kategorisë Superiore është mbyllur. Mbrëmjen e së martës mbërritën në kryeqytet futbollistët dhe stafet teknike të Kukësit, Partizanit dhe Tiranës, për të vijuar përgatitjet për rinisjen e kampionatit. Duke folur edhe me petkun e kryesuesit dhe kampionit simbolik të dimrit, trajneri i Kukësit, Ernest Gjoka u shfaq i kënaqur me punën e bërë nga skuadra e tij dhe u shpreh se verilindorët janë kandidatë të fortë për titullin.
“Trajneri kërkon që të bëhet më e mira e mundshme, – ka thënë ai. – Sigurisht presidenti ka thënë atë që kemi bërë politikën e klubit. Ne mendojmë se Kukësi është një ekip shumë i fortë, që do të jetë në garë për titullin deri në momentin e fundit.” Ndërkaq, Partizani e zhvilloi këtë fazë përgatitore me emra të rinj në skuadër, të ardhur në merkaton e janarit, siç është edhe Cetkoviç. Për trajnerin Sulejman Starovën, blerja e këtij futbollisti rrit konkurrencën në skuadër.
“Partizani është një skuadër që i ka luajtur dy fazat e para dhe kushdo që vjen, e bën këtë për ta ndihmuar klubin, – ka thënë trajneri i të kuqve kryeqytetas. – Nuk është se po bëjmë ndonjë revolucion, thjesht shtohet konkurrenca në skuadër. Cetkoviçi nuk është më i mirë sesa ata që kemi, por është një lojtar i rëndësishëm që njeh kampionatin. Nuk është se këtu ka ardhur Van Persi.” Kurse Tirana është klubi që nuk ka bërë ende asnjë lëvizje në merkato.
Kjo padyshim e ka shqetësuar trajnerin Josa, i cili theksoi se do të vijojë punën me skuadrën e tij aktuale. “Personalisht nuk pres shumë, mund të tentoj të përmirësoj gjendjen e lojtarëve që janë aktualisht në përbërje të skuadrës, pastaj çfarëdo që të na dalë e mirë apo pozitive, themi se mund ta marrim”, – tha ai. Tirana udhëtoi në të njëjtin avion me Partizanin, duke krijuar një lloj “derbi” me “të kuqtë”, situatë për të cilën Josa lëshoi edhe një batutë. “Ne jemi miq me njëri-tjetrin”, – deklaroi Josa.
