Triumfi bindës në Podgoricë është hedhur pas krahëve për ekipin verilindor që duhet të mendojë për sfidën e radhës kundër Legias së Varshavës. Ditët e mbetura deri në datën 30 korrik, trajneri Marselo Troisi duhet të heqë shumë pikëpyetje që lidhen me formacionin që ka nevojë urgjente për modifikime. Ndryshe nga sfida malazeze, Kukësi nuk do të ketë në dispozicion të paktën dy titullarë, mbrojtësin Gredi Mici dhe sulmuesin Pero Pejiç që i dha lamtumirën skuadrës për të nisur një aventurë të re në Iran.

Në këtë mënyrë, zgjidhja duhet të gjendet brenda grupit aktual. Në sulm, braziliani Mateus Lima mbetet alternativa kryesore për të zëvendësuar shtatlartin kroat. Edhe pse u zyrtarizua vetëm pak ditë më parë në radhët e klubit kukësian, Lima mund të përzgjidhet titullar për të sfiduar polakët. Në këtë mënyrë, kolonia braziliane për verilindorët mund të shkojë në 5. Nevojë urgjente për modifikime ka edhe mbrojtja pasi Mici është i pezulluar për shkak kartonësh.

Ndërsa mbrojtësi gjirokastrit Ylli Shameti nuk u grumbullua për ndeshjen e kthimit kundër Mlladost për shkak të mosmarrëveshjeve me trajnerin. Në këtë optikë, shtatlarti i repartit të tërhequr mbetet mundësia e vetme për trajnerin brazilian, i cili me shumë mundësi do ta thërrasë Shametin për sfidën e së enjtes. Në prag të ndeshjes së 5-të evropiane, klubi ka publikuar edhe çmimet e biletave që nuk ndryshojnë nga ato të sfidës ndaj Mlladost. Për tribunat A dhe B çmimet janë 2 mijë lekë, ndërsa për sektorët D1, D2 dhe D3 biletat kushtojnë 5 mijë lekë.