ASNN – Në prag të sfidës së radhës në Kategorinë Superiore, asaj të javës së 21-të me Teutën, që do të luhet të premten në “Niko Dovana”, duke nisur nga ora 16:00, trajneri i Kukësit, Mirel Josa ka dalë të enjten para mediave, duke theksuar se “është një ndeshje shumë e vështirë”. “Nuk ka më diferenca në këtë periudhë, ashtu si më përpara, – ka deklaruar ai fillimisht. – Nuk ka siguri, duhet shumë seriozitet dhe duhet të përmirësohemi. Skuadra e Teutës është e ekuilibruar, qoftë ndeshjet jashtë dhe ato brenda ka luajtur dhe ka marrë maksimumin.”
“Ka lojtarë me eksperiencë dhe nuk ka pasur shumë lëvizje në merkato, – ka vijuar Josa. – Drejtuesit kanë menduar ta konsolidojnë.” Verilindorët vijnë në këtë sfidë pas humbjes me Partizanin, një ndeshje që krijoi shumë zhurmë dhe për shkak të “Fair Play” që u aplikua nga të kuqtë, por që nuk ndryshoi asgjë përsa i përket fatit të sfidës. Lidhur me atë ndeshje, Josa ka deklaruar: “Vijmë pas një ndeshje me Partizanin, të cilën në disa fragmente e luajtëm mirë. Kishte edhe momente, që na ndëshkuam dhe nuk e përballuam dot Partizanin.”
“Mendimi im është mos e shohim atë ndeshje, por anën psikologjike sepse këtu çedojmë pak, – ka këmbëngulur trajneri kryeqytetas i verilindorëve. – Nuk duhet të kërkojmë rrugën e mesme sepse kjo varet nga niveli i skuadrave të tjera. Duhet të kërkojmë vetëm të përmirësohemi ndeshje pas ndeshje, është një grup që kërkon të përmirësohet”. Trajneri i Kukësit është i qartë, të mos përsëriten gabimet e bëra në ndeshjet e mëparshme, ose të paktën të minimizohen sa më shumë që të jetë e mundur.
“Kemi treguar se pas një ndeshje të mirë, kemi luajtur dobët dhe më pas jemi përmirësuar. Ne do mundohemi të ngremë nivelin e skuadrës sa më lart taktikisht dhe teknikisht. Pjesa fizike është kjo që është dhe nuk kemi ç’përmirësojmë. Më intereson shumë që gabimet e një ndeshje të mos i përsërisim në ndeshjen tjetër ose të bëjmë më pak”, – ka përfunduar Mirel Josa.
