ASNN – Trajneri i ri i Kosovës, Alen Zhires, ka deklaruar të mërkurën gjatë prezantimit të tij se dëshira e tij është që ta krijojë një ekip të vërtetë, i cili lufton dhe nuk dorëzohet në asnjë ndeshje. “Dua të krijojë një ekip të vërtet, kolektiv dhe që nuk dorëzohet në çdo ndeshje, – ka thënë francezi. – Pra, qoftë ndeshje e lehtë apo e vështirë, dua të shoh shpirtin luftarak, por gjithmonë duke e respektuar kundërshtarin.”
“Dua një ekip bujar, por që ka mendësi të fortë dhe luan futboll taktik e teknik, – ka vijuar ai. – Po ashtu, shpresojmë edhe në mbështetjen e tifozëve pasi ata janë lojtari i 12-të në futboll.” Po kështu, Zhires thënë se nuk ka një synim të caktuar, por gjithmonë duhet besuar se mund të arrihen objektivat. Ai ka thënë se Kosova nën drejtimin e tij do të ketë paraqitje të mira në secilin ndeshje dhe kjo automatikisht do të sjellë rezultatet pozitive.
“Sidoqoftë duhet ta zhvillojmë potencialin ekzistues, pavarësisht prej forcës, por edhe anëve tjera të ekipit, – ka thënë 69-vjeçari. – Të krijojmë një ekip pa ia caktuar vetes një limit se ku dëshirojmë të shkojmë. Duhet të kërkojmë të kemi paraqitje të mira në secilën ndeshje. Në secilën ndeshje të kemi qasje të njëjtë dhe kjo është shumë e rëndësishme. Pra, të japim më të mirën nga vetja dhe të mundohemi sa më shumë për rezultate më të mira.”
“Nuk mund të them se cilët janë kufijtë e Kosovës, por duhet të kemi ambicie sikurse çdo vend tjetër, – ka vijuar ish-futbollisti i njohur francez. – Secili lojtar që vjen duhet ta ketë këtë ambicie. Nuk mund të bëjmë një parashikim për Ligën e Kombeve të Evropës, nëse jemi në grupin e favoritëve por kjo nuk duhet të na shqetësojë pasi loja bëhet në fushë. Ne duhet sidoqoftp të japim maksimumin, pa e nënvlerësuar apo mbivlerësuar ekipin që e kemi përballë.”
“Dhe, pse jo mos të besojmë në atë befasinë e këndshme. Nëse nuk kemi ambicie i reduktojmë mundësitë tona. Gjithçka është e mundur në futboll dhe kjo është magjia e këtij sporti. Ne sidoqoftë kemi shpresa. Pra, sigurisht që shpresojmë se do të bëjmë diçka të mirë”, – ka përfunduar Zhires. Kontrata e trajnerit të ri të Kosovës, është e vlefshme deri në fund të vitit 2023. Ai do ta drejtojë Kosovën në Ligën Kombeve të këtij vitit dhe në Eliminatoret për Evropianin të vitit 2024. Kontrata e tij është e vlefshme deri në nëntor të vitit 2023.
