ASNN – Marko Kalvani pritet të udhëheqë skuadrën e SIGAL Prishtinës në pjesën e dytë të këtij edicioni. Trajneri italian pritet që gjatë këtyre ditëve të zyrtarizohet te klubi bardhekaltër, pasi, të mërkurën mbrëma, ka arritur në Prishtinë, kurse punën pritet ta vazhdojë më vonë, shkruan sot e përditshmja e mirënjohur vendase, “Koha Ditore”.

Në postin e trajnerit, italiani do të zëvendësojë kroatin Jeronimo Sharin, të cilit nuk i është zgjatur kontrata, që përfundonte në fund të dhjetorit të 2016-ës. Në fakt, Kalvani 53-vjeçar, do të jetë trajneri i tretë tek SIGAL Prishtina në këtë edicion të turbullt për ekipin kryeqytetas.

Para Kalvanit dhe Sharinit, skuadrën prishtinase e ka udhëhequr Petar Mijoviçi, që ishte rekrutuar para fillimit të këtij edicioni, por që dha dorëheqjen pas katër ndeshjeve të para, duke regjistruar po aq humbje me skuadrën kampione në fuqi të Kosovës, por edhe fituesen në fuqi të Ligës Ballkanike të Basketbollit për Meshkuj.