ASNN – Futbollisti i përfaqësueses së Kosovës, Amir Rrahmani, ka shënuar të shtunën golin vendimtar për Napolin, që u rikthye tek fitorja pas dy humbjeve e një barazimi në Serinë A.
Rrahmani e shënoi golin pikërisht në fundin e ndeshjes në fitoren 2-1 të Napolit ndaj Salernitanas, në ndeshjen e vlfeshme për javës së 20-të të elitës së futbollit të Italisë. Për qendërmbrojtësin 29-vjeçar të Kosovës ishte goli i parë i edicionit aktual.
Antonio Kandreva shënoi për skuadrën mike në minutën e 29-të, kurse Mateo Politano i barazoi shifrat nga pika e bardhë e 11-metërshit në minutën e 4-t shtesë të pjesës së parë.
Por, me golin e minutës së 96-të, Rrahmani i siguroi kampiones në fuqi të Italisë një fitore shumë të rëndësishme. Napoli tani ka 31 pikë, por ka mbetur shumë prapa kreut të renditjes, kurse Salernitana në vendin e fundit ka 12 pikë.
