ASNN – Azerbajxhani, si shtet organizator i Lojërave të para Evropiane, nuk e njeh Kosovën dhe as pasaportat e saj. Zyrtarët kosovarë të sportit besojnë se me një ndërhyrje “nga lart” do të mundësohet futja e sportistëve kosovarë në Azerbajxhan, por për tifozët kosovarë kjo do të jetë e pamundur, përderisa të mos kenë ndonjë pasaportë tjetër. As Brazili, ku do të mbahen Lojërat Olimpike 2016 nuk e njeh Kosovën dhe pasaportat e saj, por ky shtet ofron ca mundësi tjera

Organizatorët e dy ngjarjeve të mëdha olimpike, Azerbajxhani dhe Brazili, nuk e njohin ende shtetin e Kosovës. Në Azerbajxhan vitin tjetër do të mbahen Lojërat e para Evropiane, ndërsa në Brazil në vitin 2016 mbahen Lojërat Olimpike. Ndonëse Azerbajxhani nuk njeh Kosovën dhe pasaportat e saj, kryetari i Komitetit Olimpik të Kosovës, Besim Hasani, nuk pret që sportistët kosovarë të kenë vështirësi të hyjnë në këtë vend për të garuar në Lojërat Evropiane që mbahen nga 12 deri më 28 qershor të vitit tjetër.

Hasani javë më parë ka vizituar Azerbajxhanin dhe nuk ka pasur probleme të hyjë në këtë shtet. Të martën, Kosova u pranua si anëtare e plotë në Komitetin Olimpik Ndërkombëtar (IOC) dhe automatikisht edhe në Komitetin Olimpik Evropian (EOC). Kryetari i KOK-ut ishte i ftuar në Asamblenë e Përgjithshme të EOC-it që u mbajt në Baku gjatë nëntorit. Në këtë qytet do të mbahen edhe Lojërat Evropiane. “Kam parë një korrespondencë mes një përfaqësuesi të Komitetit Olimpik Evropian dhe një zyrtari të Azerbajxhanit” – ka zbuluar Hasani për “Koha Ditore”.

“Zyrtari i Azerbajxhanit ka thënë se do të jetë vështirë që unë të futem në këtë vend, pasi Azerbajxhani nuk njeh Kosovën, nuk ka marrëdhënie diplomatike dhe nuk njeh as pasaportën kosovare, – ka vijuar ai. – Por kur kam arritur në kufi jam befasuar për të mirë. Njerëzit me pasaporta diplomatike kanë pritur në radhë, ndërsa mua më janë hapur dyert dhe kam kaluar shumë shpejt. Është e qartë se ka pasur ndikim korrespondenca me Komitetin Olimpik Evropian.”