ASNN – Sipas asaj që raportojnë mediat e Prishtinës, nuk pritet që Kosova të fitojë medalje në pjesëmarrjen e parë në Festivalin Evropian Olimpik Dimëror për Të Rinj (EYOWF 2017). Në këtë Olimpiadë Rinore Dimërore, që mbahet në Erzurum të Turqisë, Kosova përfaqësohet me 5 sportistë, ndërsa është Komiteti Olimpik i saj (KOK) që ka shpalosur edhe “synimet”.

Dhe ajo që shpresohet si synim, është vetëm që paraqitja e skiatorëve Adea Haxhidauti, Lyra Hoxha, Arbi Pupovci, Vernor Gjurkaj dhe Grenita Grazhda të jetë sa më e mirë. Ceremonia e hapjes e kësaj ngjarje për sportistë të grupmoshës nga 14, deri në 18 vjeç, është mbajtur të dielën, ndërsa të hënën (sot) kanë nisur garat. Ndërsa ky është edicioni i 13-të i Festivalit Evropian Olimpik Dimëror për Të Rinj.

Kjo veprimtari përfundon më 17 shkurt 2017, ndërsa gjithsej garojnë mbi 600 sportistë të 34 shteteve evropiane. Sa u përket disiplinave, do të garohet në 9 sporte të ndryshme dimërore. Katër sportistë të Kosovës do të garojnë në skitë alpine, përkatësisht në sllallom dhe sllallom të madh. Ndërsa Grenita Grazhda garon në “snoubord”.

Sportistët kosovarë kanë zhvilluar stërvitje në qendrën e skive në Turqi dhe janë njohur me pistën. Kryetari i KOK-ut, Besim Hasani ka thënë se Festivali do të jetë përvojë e mirë para Lojërave Olimpike Dimërore të vitit të ardhshëm