ASNN – Federata e Shenjëtarisë (Qitjes) Sportive e Kosovës(FSHSK) ka regjistruar katër garues për pjesëmarrjen në Kampionatin Evropian, që mbahet nga data 22, deri më 28 shkurt në Gjor të Hungarisë.
Por, FSHSK-ja rrezikon të mos paraqitet në këtë Evropian, meqë i ka mbetur 300 euro borxh për shkak të moslikujdimit të kuotizacionit për vitin e kaluar Konfederatës Evropiane të Qitjes (ESC).
Në statutin e Konfederatës Evropiane të Qitjes thuhet se çdo federatë ka për detyrim që të paguajë kuotizacionit në afatin e caktuar, ndryshe nuk do të lejohet të marrë pjesë në garat që ajo organizon.
Këtë nuk e ka bërë FSHSK-ja, me arsyetimin se nuk ka buxhet, raportojnë mediat e Prishtinës. “Tarifat vjetore për anëtarësim janë të përcaktuara për një periudhë dyvjeçare nga një votim në Asamblenë e Përgjithshme të ESC-së”, – thuhet në statutin e Konfederatës Evropiane të Qitjes.
“Pagesa e kësaj tarife duhet bërë deri më 31 mars, – vijon më tej ky statut. – Një federatë që nuk e ka paguar tarifën vjetore të anëtarësimit apo çdo obligim tjetër deri më 31 mars të këtij viti, do t’i privohen gjitha të drejtat brenda ESC-së, përfshirë të drejtën e votimit dhe të pjesëmarrjes në të gjitha kampionatet zyrtare.”
Në FSHSK thonë se nuk kanë pasur mjete financiare për të paguar kuotizacionit. Ankohen se nuk kanë as sot. Kësisoj, teksa synohet ndërkombëtarizimi i sportit, në Kosovë ndodhin edhe kësi ndodhish, sa të pakëndshme, aq edhe joserioze.
