ASNN – Institucionet shëndetësore në Kosovë kanë dhënë leje që skuadrat e futbollit në vend të stërviten dhe, që, nesër, të edhe të luajnë ndeshje. Por nuk ka vendim për skuadrat e sporteve tjera. Të dielën ka pasur reagime të shumta nga drejtues të xhudos, hendbollit, karatesë e sporteve tjera për mungesë të një vendimi lidhur me rifillim të veprimtarive për sportet tjera, pos futbollit.
Por presidenti i Komitetit Olimpik të Kosovës, Besim Hasani ka thënë të hënën mbrëma se edhe në sportet tjera skuadrat mund të nisin me stërvitje, nëse u përmbahen rekomandimeve. Madje sipas Hasanit kjo mund të bëhet pa vendim të ri të Ministrisë së Shëndetësisë. Të hënën, ai ka pasur biseda me drejtuesit e Ministrisë së Shëndetësisë, të Kulturës, Rinisë e Sportit, por edhe me ata të Institutit Kombëtar të Shëndetit Publik.
Sipas kreut të organizmit që qeveris lëvizjen olimpike në Kosovë, të gjithë konsiderojnë se nëse drejtuesit e federatave, klubeve, trajnerët e sportistët marrin përgjegjësinë dhe respektojnë këshillat e OBSH-së, udhëzuesin e MSH-së dhe IKSHPK-së dhe protokollin e përgjithshëm, mund të vendosin të fillojnë me stërvitje pa pritur vendim. “Çdo federatë, klub, trajner e sportist e vlerëson situatën veç e veç, duke pasur parasysh se në rend të parë është shëndeti i sportistëve dhe pjesëmarrësve tjerë në stërvitje”, ka thënë Hasani për faqen zyrtare të KOK-ut.
Shumë prej klubeve kanë shpresuar të fillojnë me stërvitje të hënën. Shumica në fakt edhe e kanë bërë këtë, ndonëse nuk ka ndonjë vendim që ua lejon.
