ASNN – Kampionia e Kosovës, Ballkani, ka fituar miqësoren me skuadrën polake, Jagiellonia, që mban vendin e dytë në elitën polake të futbollit. Të martën mbrëma në Antalia të Turqisë, skuadra e trajnerit Ilir Daja fitoi me rezultatin 2-1. Kapiteni Edvin Kuç dhe Vesel Limaj ishin ata që shënuan golat për Ballkanin. Ndërkaq, edhe skuadra e Dritës ka vazhduar me formën e mirë në Antalia të Turqisë, ku është duke e kryer fazën përgatitore.
Të martën, Drita ka shënuar edhe fitoren e 3-të radhazi në po aq ndeshje miqësore të luajtura deri më tani, teksa ka mposhtur ekipin nga Polonia, Lehian e Gdanjskut me rezultatin 2-1. Arb Manaj, në minutën e 4-t dhe Albin Prapashtica, në të 78-ën kanë shënuar golat në këtë përballje për ekipin nga Kosova. Para Lehias së Gdanjskut, në Antalia të Turqisë, Drita ka mposhtur edhe Vashashin e Hungarisë, me shifrat 6-1, dhe Çernomoretsin e Odesës së Ukrainësm ne rezultatin 3-1.
Miqësoren e fundit në Antalia, Drita e luan të premten kundër skuadrës tjetër nga Polonia, Ruh Horzovin. Edhe Dukagjini ka mposhtur skuadrën e njohur bullgare, Levskin e Sofias, në miqësoren e zhvilluar të martën në Antalia të Turqisë. Skuadra nga Klina fitoi me rezultatin 2-1. Blerind Morina dhe Besir Iseni shënuan golat për Dukagjinin. Dhe, së fundmi, ndeshje miqësore të martën në Turqi ka zhvilluar edhe skuadra e Gjilanit.
Gjilani mposhti 1-0 skuadrën nga Kazakistani, Kizilzhar, teksa fatin e sfidës e vendosi një autogol i minutës së 53-të. Për Gjilanin është ndeshja e fundit përgatitore në Antalia, ku janë përgatitur shumica e skuadrave të Superligës së Kosovës në futboll.
