ASNN – FIBA përshëndet tifozët e Prishtinës për spektaklin që dhuruan në Kupën e Evropës. Tifozeria e klubit të basketbollit të Prishtinës ka shkëlqyer në këtë sezon të Kupës së Evropës, ku Prishtina jo vetëm mori pjesë, por arriti deri në turin e 16-shes, duke luajtur si e barabartë me rivalët e saj dhe duke dhënë emocione për sportdashësit e saj.
Për ta përshkruar bukur sa më s’ka këtë paraqitje fantastike të tifozerisë së klubit të basketbollit të Prishtinës ka menduar vetë FIBA, e cila në faqen e saj zyrtare në rrjetin social “Facebook” ka dhënë një mesazh të qartë e domethënës në shenjë vlerësimi. Bëhet fjalë për vlerësimin që në fakt i bëhet tifo-grupit të famshëm “Plisat”, që shquhet për adrenalinën që përcjell.
Sidomos sa herë skuadrat shqiptare të Kosovës por edhe Kombëtarja e Shqipërisë paraqiten në ndeshjet ndërkombëtare. “Përshëndetemi me tifozët ndër më të mirët që kemi parë ndonjëherë në FIBA Europe Cup. Sezon historik për Prishtinën”, – shkruan FIBA në faqen e vet zyrtare. Padyshim që ky është një moment i veçantë për tifozerinë e Prishtinës dhe për vetë klubin e basketbollit të kryeqendrës së Kosovës.
