Afërdita Fazlia, që vjen nga Drenica, komuna Skenderaj, në cilësinë e trajneres së përfaqësueses së Kosovës në futboll për femra përcolli vlerësimet më të mira për ditët që ka kaluar në Shqipëri si pjesë e këtij kursi trajnerësh. Fillimisht Fazlia bëri të ditur diçka nga karriera e saj duke vënë në dukje se ka shumë vite që është pranë futbollit si lojtare, trajnere dhe drejtuese.
Ajo tha se ka luajtur futboll në kampionatin e femrave prej viteve 1984-1985, dy vite është aktivizuar në ligën e dytë të ish-Jugosllavisë dhe më pas edhe katër vite të tjera në Ligën e parë të ish-Jugosllavisë. Madje ka qenë përherë e përzgjedhur edhe në kombëtare. Për disa vite ka qenë edhe kapitene e klubit të Prishtinës. Kosova ka patur vetëm një ekip femrash e të gjitha garat janë zhvilluar në kuadrin e ish-shtetit jugosllav.
Nisur nga rrethanat politike është ndërprerë veprimtaria sportiv deri pas luftës, ku vetë Afërdita riaktivizoi klubin e femrave të Prishtinës duke e udhëhequr dy vite. Dhe më pas, prej asaj kohe, ka vijuar në edukimin dhe shkollimin për trajnere futbolli. Licencat e saj janë të përfituara në Prishtinë, në Suedi, në Shqipëri dhe tanimë është duke marrë dhe licencën “UEFA Pro”.
“Shkolla e edukimit në Federatën Shqiptare të Futbollit është një prej shkollave më të avancuara në rajon, – ka deklaruar ish-futbollistja, tashmë trajnere në Kosovë. – Unë kam pas fatin të vizitoj dhe t’i shikoj prej së afërmi edhe shkollat e tjera. Këtu kam përfunduar edhe licencën A, ndërkohë që ajo UEFA Pro është diçka më tepër. Mund të themi se është një magjistraturë dhe doktoraturë e rregullt.
“Dhe me siguri për mua ka qenë disi më e vështirë pasi kam qenë e vetmja femër, – vijoi Fazlia. – Megjithatë kam hasë në një grup tepër të mirë, me trajner tepër të rregullt dhe të disiplinuar. Besoj se do t’ia dalim edhe për atë se futbolli i femrave nuk mund të ecë përpara nëse nuk do të ketë edhe mbështetjen dhe bashkëpunimin me atë të meshkujve.
