ASNN – Trajneri i Kosovës, Franko Foda dhe mesfushori Elvis Rexhbecaj, dolën të enjten në mbrëmje në një konferencë për shtyp në Bukuresht, në prag të sfidës vendimtare të së premtes me Rumaninë vendase.

Mesfushori i Kosovës, Elvis Rexhbecaj, theksoi rëndësinë e kontrollimit të lojës në mesfushë dhe angazhimin e të gjithë ekipit për të fituar. “Stërvitjet kanë shkuar shumë mirë këtë javë”, – ka thënë ai.

“Besoj se jemi gati, e dimë se çfarë atmosfere na pret, por ne jemi futbollistë profesionistë të gjithë, jemi të përgatitur 100% për ndeshjen kundër Rumanisë”, – ka vijuar futbollisti dardan.

“Na duhet që ta kontrollojmë lojën në mesfushë, por duhet të gjithë të luftojmë së bashku, pasi kemi ekip shumë cilësor në ofensivë. Do të luajmë të bashkuar në mënyrë që ta dominojmë lojën”, – përfundoi Rexhbecaj.