ASNN – Kanë qenë në fakt edhe dy prej vendeve më pak të prekura të rajonit dhe, prandaj, do të marrin guximin e do ta provojnë. Dy vende të Ballkanit, si Kroacia e Mali i Zi, kanë në plan rikthimin e publikut në stadiume, ndërsa përgatitet të rifillojë sezoni i futbollit. Në Kroaci, parashikohet që kjo të ndodhë në gjysmëfinalen e parë të Kupës mes Slaven Belupos dhe Lokomotivës së Zagrebit, që pritet të luhet në 30 maj.
Një njoftim të tillë e bëri vetë Federata Kroate e Futbollit. E përditshmja kroate, “Jutarnji List” shkruan se Federata dha lajmin e madh se do të përpiqet të kthejë në stadium lojtarin e 12-të. Pyetja që shtrohet si argument në këtë rast, është: Përderisa njerëzit shkojnë në teatër, në kisha e në pishina, përse të mos shkojnë në stadium? Tek Lokomotiva e Zagrebit, luajnë plot 5 futbollistë shqiptarë.
Ata janë si Myrto Uzuni, Jon Mersinaj, Indrit Tuci, Enis Çokaj dhe Lirim Kastrati, i huazuar nga Dinamo e Zagrebit dhe që bën pjesën në ekipin përfaqësues të Kosovës. Por edhe Mali i Zi nuk do të mbetet prapa. Ndeshjet e Ligës së Parë do të nisin të luhen me tifozë që këtë fundjavë. Kryeministri malazez, Dushko Markoviç, u shpreh me krenari se vendi i tij është i pari në Evropë që nuk ka më raste me virus korona, ndërsa informoi qytetarët në konferencën për shtyp edhe për të tjera lajme të mira.
“Do të lejohen dasmat, pagëzimet, publik më i kufizuar se zakonisht në aktivitetet sportive”, – u shpreh kryeministri malazez. Liga e Parë malazeze është ndërprerë për plot ka 84 ditë, ndërsa mbeten edhe 13 javë deri në përfundim të sezonit aktual. Buduçnosti i Podgoricës kryeson me 11 pikë më shumë sesa kampionia e dy viteve të fundit, Sutjeska, dhe është në rrugë të mbarë për t’i rrëmbyer kësaj të fundit kurorën e çmuar.
