ASNN – Për herë të parë histori, përfaqësuesja e Shqipërisë do të përballet me atë të Italisë në nivel të rriturish. Kjo ndeshje do të luhet në stadiumin “Tardini” të Parmës më 18 nëntor 2014, duke nisur nga ora 18:00. Një gjë të tillë e kanë konfirmuar zyrtarisht për AlbanianSport.com burime pranë Federatës Shqiptare të Futbollit.
Tashmë është zyrtare. Ajo që për shumë vite ka qenë një ëndërr për shumicën e sportdashësve shqiptarë do të bëhet realitet më 18 nëntor 2014, në ora 18:00, kur Kombëtarja kuqezi të zbresë në fushën e blertë të Stadiumit “Tardini” të Parmës për t’u ndeshur me Italinë.
Një gjë të tillë e kanë konfirmuar për AlbanianSport.com burime pranë Federatës Shqiptare të Futbollit, që kanë theksuar se në ditët në vijim pritet vetëm bërja publike e kësaj ndeshjeje. Kjo është ndeshja e parë në histori në nivel të rriturish midis përfaqësueseve të të dy vendeve, ndërsa duhet theksuar se jemi ndeshur dy herë me përfaqësuesen e Nën-21-vjeçarëve, apo Shpresave.
Një herë ka qenë në vitit e lartë 1984, në kuadër të Eliminatoreve të Evropianit të kësaj grupmoshe, ku Italia na mundte me një gol të vetëm, si në Stadiumin Kombëtar “Qemal Stafa”, ashtu edhe në Bari, në ndeshjen e kthimit. Përballja e dytë ka ardhur pak vite më parë, kur Italia e Nën-21-vjeçarëve të drejtuar nga Pjerluixhi Kaziragi do të na mundte 4-0 në fushën e vet dhe 1-0 në Durrës.
Miqësorja me Shqipërinë më 18 nëntor 2014 dëshmon se fqinjët tanë të përtej Adriatikut na vlerësojnë si një kundërshtar potencial për të testuar veten. Për më tepër, fitorja në fushën e Portugalisë i ka dhënë zemër e besim kombëtares shqiptare të futbollit, por njëkohësisht e ka rivlerësuar pozitivisht në sytë e të tjerëve.
