ASNN – Kombëtarja shqiptare e futbollit ka fituar 2-0 me Luksemburgun, në miqësoren e dytë të luajtur në fushë të huaj, në datat e përcaktuara më parë nga FIFA dhe UEFA. Kanë mjaftuar golat e shënuar nga Sadiku e Cikalleshi për të rikthyer entuziazmin në skuadër dhe në stolin e kuqezinjve.
Shumë eksperimente në formacion nga ana e trajnerit Xhani De Biazi për këtë sfidë, kushtëzuar edhe nga mungesat për shkak të dëmtimi të Hysaj, Mavraj dhe Xhakës. Pjesa e parë ka patur disa raste për shënim për kuqezinjtë, por pa mundur t’i finalizojnë me gol.
Në minutën e 17-të, Gashi ekzekuton bukur një goditje dënimi me të majtën, por edhe pritja e Zhuberit është mjaft e bukur. Në të 26-ën, tjetër rast për kuqezinjtë por largon me këmbë topin portieri i Luksemburgut. Në minutën e 44-t, Zhuberi pengon Cikalleshin dhe, duke qenë lojtari i fundit, ndëshkohet me karton të kuq.
Goditje dënimi për Shqipërinë. Gjuan vetë Cikalleshi por topi përfundon jashtë kuadratit. Pjesa e parë mbyllet me rrjeta të paprekura. Në 45 minutat e dyta, trajneri De Biazi u jep mundësinë edhe disa lojtarëve të tjerë për të luajtur me ndërrimet e bëra. Portieri Shehi, Sadiku, Abrashi, Kaçe i japin një frymë të re skuadrës.
Dhe, në minutën e 62-të, i sapofuturi në lojë, Sadiku, e kalon Shqipërinë në epërsi. Ai gjuan saktë me kokë pas një topi të të saktë të ardhur nga Kaçe nga krahu i djathtë i sulmit tonë. Në 74-tën Cikalleshi shënon golin e dytë për kuqezinjtë. Një fitore e merituar kjo për skuadrën e De Biazit, pas asaj humbje 2-1 me Austrinë, ndeshje kjo e luajtur të shtunën në Vjenë.
