ASNN – Shqipëria është mundur 0-2 nga Serbia të enjten, në ndeshjen e zhvilluar në Stadiumin “Elbasan Arena”, duke kompromentuar seriozisht kualifikimin automatikisht për në Evropianin e vitit të ardhshëm. Kolarovi, në minutën e parë shtesë, dhe Ljajiçi në atë të 3-tën, kanë firmosur një fitore morale për serbët, të cilët sidoqoftë ishin skualifikuar përsa i përket “Euro 2016”-s. Emocionet e kësaj sfide u sollën për sportdashësit drejtpërdrejt nga Rrjeti i Radio-Televizionit Shqiptar në një transmetim maratonë.
Ishte cilësuar si ndeshja e shekullit për futbollin shqiptar, por është mbyllur në mënyrën më të hidhur të mundshme, pasi Serbia na ka mundur paq, 0-2, e për më tepër në minutat shtesë, duke dëshmuar edhe një herë se, përtej sigurimit të vendit në “play-off”-in e Euro 2016”-s, Shqipëria ka ende për të mësuar përsa i përket arritjeve madhore në arenën ndërkombëtare. Me një atmosfere elektrizuese në “Elbasan Arena” kuqezinjtë e De Biazit e nisin mirë sfidën.
Ata bëjnë më tepër volum loje dhe e synojnë portën kundërshtare, por serbët janë më të rrezikshëm dhe Ivanoviç ishte pranë golit në minutën e 22-të, por nuk arrin të finalizojë një skemë të bukur të skuadrës së tij. Madje serbët do ta gjejnë edhe golin në minutën e 37-të. Mitroviç depërton bukur brenda zonës duke lënë mbrapa Canën. Pason në qendër dhe pas një rrëmuje, Ljajiç e shtyn në rrjetë.
Por gjyqtari ndal lojën për ndërhyrje të parregullt ndaj Berishës. Ka tension dhe protesta nga pala serbe, por gjyqtari nuk tundet, ndërsa në fundin e pjesës së parë Shqipëria humbet edhe Andi Lilën i cili pëson një dëmtim dhe dhe do të zvëndësohet. Me rrjeta të paprekura do të mbyllen 45 minutat e para, ndërsa ato të dytat janë më të hapura në lojën e dy skuadrave, të cilat kanë patur rastet e tyre.
Por lodhja dhe shthurja taktike, e ndërthurur me një paraqitje skandaloze në mbrojtje të kapitenit Lorik Cana, kanë bërë që serbët të gjejnë dy gola të fundit. Fillimisht Kolarov do të finalizojë një aksion të bukur të serbëve, duke mposhtur portierin Berisha nga një kënd i prirët. Ndërsa afro 100 sekonda më pas, një ndërhyrje e pamenduar e qendërmbrojtësit të Nantës, i ka dhënë mundësi Ljajiç të shënojë golin që do të vulosë fitoren e serbëve.
