ASNN – Trajneri i Kombëtares shqiptare të futbollit, Edoardo Reja ka deklaruar se shpreson shumë që lojtarët kuqezi të jenë në formë të mirë në muajin mars, kur nisin edhe eliminatoret e Botërorit 2022. Shorti i vendosi Shqipërinë në Grupin I së bashku me Anglinë, Poloninë, Hungarinë, Andorrën dhe San Marinon, teksa kuqezinjtë e nisin këtë aventurë më 25 mars në vizitën që do t’i bëjnë Andorrës. Duke folur për emision sportiv “Pressing” në televizionin informativ shqiptar “ABC News”, trajneri italian analizoi situatën e lojtarëve kryesorë të ekipit kuqezi dhe objektivat e tij deri në mars, teksa shpreson që gjendja të përmirësohet deri në nisjen e Eliminatoreve.
“Pritshmëritë janë të shumta këtë vit për ekipin tonë, sepse me këtë nisje të eliminatoreve të Botërorit ka shumë entuziazëm, ndonëse jemi në një grup me Anglinë, Poloninë dhe Hungarinë, – ka deklaruar fillimisht ai. – Unë po shpresoja të ishim në grupin e Kroacisë, ku do të kishim më shumë, por shorti na dha këtë rezultat. Sidoqoftë, pres që skuadra të rritet. Uroj shumë që lojtarët, në mënyrë të veçantë Thomas Strakosha dhe Etrit Berisha, që nuk po luajnë, Elseid Hysaj, që nuk po gjen hapësirë në formacion, Kumbulla që nisi mirë dhe tashmë nuk e ka më këtë situatë.”
“Pra lojtarët që unë i cilësoj si vendimtarë të mund të luajnë vazhdimisht që të jenë në formë për muajin mars, – ka vijuar trajneri kuqezi. – Sidoqoftë, është ende herët të flasim sepse jemi në ditët e para të janarit. Por uroj që nga tani e deri në mars këta lojtarë nëse nuk luajnë si titullarë, të paktën të rrisin prezencën e tyre të fushë, të marrin minuta më shumë. Kush luan natyrisht që do të arrijë në formën më të mirë. Për shembull, Berat Gjimshiti, luan gjithmonë, madje luan 3 ndeshje në javë dhe ka arritur në atë pikë maturie sa nuk lodhet fare dhe unë e them që luan me cigare në gojë, në aspektin metaforik.”
“Është përmirësuar shumë kohët e fundit dhe të luash në Ligën e Kampioneve, natyrisht që ke rritje në kondicionin fizik dhe teknik dhe bën paraqitje të mira, – ka pohuar 75-vjeçari. – Shpresoj që të gjithë të tjerët të luajnë dhe kjo është një çështje që në fakt më tremb shumë aktualisht. Abrashi ka fare pak minuta, e hedhin në fushë në minutat e fundit. Ardian Ismajli te Spezia s’ka aktivizim, përjashto javën e kaluar, ku luajti vetëm 20 minuta. Shpresoj shumë që të marrin minutat për marsin, sepse ky është një aspekt thelbësor për ne”, – ka përfunduar trajneri i Kombëtares, Edoardo Reja.
