ASNN – Kombëtarja shqiptare ka rinisur të enjten përgatitjet për miqësoren e fundit të nëntorit, atë ndaj Armenisë që luhet më datë 19 nëntor në Stadiumin “Arena Kombëtare” dhe që nis në ora 17:30. Nën drejtimin e trajnerit Edoardo Reja grupi ka zbritur në fushën e kompleksit të saj stërvitor në Durrës në orët e paradites për të zhvilluar një seancë të lehtë stërvitore, kryesisht me lojtarët që nuk u aktivizuan apo me ato që u aktivizuan vetëm pak minuta në ndeshjen e të mërkurës mbrëma ndaj Italisë.
Ndërsa lojtarët titullarë kanë zhvilluar një seancë të reduktuar me ushtrime dhe pa ngarkesa fizike. Sipas burimeve në kampin kuqezi, mësohet se për miqësoren me Armeninë do të ketë sërish ndryshime në listën e kombëtares. Sulmuesi Armando Broja, i cili doli nga loja i dëmtuar në ndeshjen me Italinë pas një problemi në kavilje, u është nënshtruar testeve mjekësore dhe pas konsultimeve me stafin mjekësor dhe stafin teknik, është konkluduar se ai nuk mund të jetë i gatshëm për miqësoren e së shtunës.
Kësisoj, sulmuesi është larguar nga grumbullimi për t’u rikthyer pranë klubit të tij. Sakaq, për ndeshjen e së shtunës me armenët nuk do të jenë të gatshëm as mesfushori Odise Roshi dhe sulmuesi Myrto Uzuni, të cilët janë larguar gjithashtu nga grumbullimi. Të dy lojtarët do të rikthehen me klubet sipas akordit paraprak mes palëve pasi janë të impenjuar këtë fundjavë në ndeshjet e kampionateve përkatëse ku ata aktivizohen.
Sa i takon pjesës tjetër të lojtarëve aktualisht nuk ka probleme me dëmtimet, ndërkohë që skuadra do të zhvillojë të premten në ora 15:00 stërvitjen zyrtare në Durrës, para ndeshjes me Armenisë, kurse konferenca zyrtare për shtyp me trajnerin Reja dhe një lojtar do të zhvillohet në ora 14:30 po në Durrës.
