ASNN – Azdren Llullaku e ka vlerësuar mjaft rikthimin në Kombëtare dhe besimin që i ka dhënë trajneri Xhovani De Biazi, duke i besuar formacionin si titullar. Ndërsa për Bekim Balaj, fitorja ndaj Lihtenshtejnit ka një rëndësi të veçantë, pasi shkojnë në ndeshjen ndaj Spanjës, me 6 pikë të plota.
Azdren Llullaku, sulmuesi i Gaz Metanit në Rumani ka luajtur si titullar në sfidën me Lihtenshtejnin. Ai ka bërë një ndeshje të mirë duke krijuar disa raste për shënim. 28-vjeçari është i lumtur për rikthimin në kombëtare dhe shpreson të luajë edhe ndaj Spanjës.
“E kisha ëndërr të kthehesha në kombëtare, – ka theksuar futbollisti që humbi një rast të mirë për shënim në pjesën e parë. – Jam i kënaqur që u ktheva dhe e fillova me fitore. Më vjen mirë që trajneri ishte i kënaqur me paraqitjen time. Kjo ishte ndeshja e parë, kisha më shumë emocione, por të jem edhe më mirë në të ardhmen.”
Bekim Balaj, autori i golit të dytë ndaj Lihtenshtejnit e vlerëson si të rëndësishme fitoren. Për të kundërshtari ishte i lehtë në letër, por në fushë tregoi se ishte e kundërta. “Ishte një ndeshje e rëndësishme për ne, – tha sulmuesi shkodran i kuqezinjve. – Ishim të detyruar që të fitonim.”
“Ishte e sikletshme, pasi në letër na dukej e lehtë, arritëm të menaxhonim lojën dhe të shënonim, – ka vijuar Balaj. – Arritëm të gjenim golin duke ushtruar presion dhe më pas kontrolluam lojën me zgjuarsi, pasi të tilla ndeshje duhet kujdes. Unë jam tifoz i Realit të Madridit, këtë gjë i kam thënë edhe gjatë ndeshjes në Portugali Pepes kur i shënova, shpresoj të shënoj edhe përballë Ramosit të dielën.”
Ndërkohë, Jahmir Hyka, futbollist i cili ka shënuar 2 nga 4 golat e deritanishëm të Kombëtares kuqezi ndaj përfaqësueses së Principatës “gjermanike”, tha: “Nuk ishte një ndeshje e lehtë, pasi Lihtenshtejni ishte i mbyllur në mbrojtje dhe ishte e vështirë, por jam i lumtur me fitoren.”
Kurse kapiteni Mërgim Mavraj, deklaroi shkurtazi: “Kemi cilësitë tona dhe duhet të jemi të fokusuar, por na duhet edhe pak fat me këto skuadra, pasi kanë lojtarë të mirë.” Shqipëria luan të dielën ndaj Spanjës, ndeshjen e tretë në grupin G eliminator për të Botërorit “Rusi 2018”.
