ASNN – Pasi arriti kualifikimin historik për në “Euro 2016” me fitoren e së dielës 3-0 në Armeni, mesditën e kësaj të hëne Kombëtarja shqiptare e futbollit ka mbërritur në Aeroportin e Rinasit, e nisur rreth orës 11:30 nga Aeroporti i Jerevanit në drejtim të Tiranës. Kuqezinjtë kanë arritur me vonesë për shkak të një vonese që patën në Armeni.
Ka qenë Kryeministri Edi Rama, ai që i ka pritur i pari, i ndjekur më pas edhe nga Ministrja e Arsimit dhe Sportit, Lindita Nikolla, dhe disa zyrtarë të tjerë. Ndërsa ata që prinë kombëtaren në zbritjen në tokën shqiptare kanë qenë presidenti i FSHF-së, Armando Duka, së bashku me trajneri italian të kuqezinjve, Xhovani De Biazi. Ata janë pritur nga një numër i madh tifozësh të mbledhur prej disa orësh në aeroport.
Autobusi i kombëtares është shoqëruar nga policia deri në sheshin “Nënë Tereza”, ku ka nisur festa me mijëra tifozët e tjerë që kanë qëndruar në pritje në qendër të Tiranës. Tifozë të shumtë pritën lojtarët e Kombëtares në mbërritjen e tyre në aeroportin “Nënë Tereza” rreth orës 15:00. Mbështetësit e kuqezinjve qëndruan gjatë për të parë edhe nga larg ekipin, që siguroi për herë të parë kualifikimin në një Kampionat Evropian.
Në aeroport doli edhe Kryeministri Edi Rama, i cili i takoi futbollistët një për një. Arritje e kuqezinjve është historike dhe e tillë ishte edhe pritja e tyre, duke u kthyer në një festë. Autobusi me lojtarët u largua menjëherë nga aeroporti, i shoqëruar nga brohoritjet e tifozëve, të cilët nuk mund ta humbnin një rast të tillë. Ndalesa e parë e parë ishte në bulevardin “Dëshmorët e Kombit”, para Kryeministrisë, ku ishin mbledhur mijëra vetë.
Akoma më të shumtë ishin në sheshin “Nënë Tereza”, ku ekipi shkoi për të përshëndetur ata që e mbështetën në çdo ndeshje. Kombëtarja arriti qëllimin e vendosur në fillim të Eliminatoreve, ëndrra më shumë se 50-vjeçare, u realizua.
