ASNN – Shqipëria ka marrë një barazim në Paris dhe një fitore në Elbasan përballë Francës, por, për qendërmbrojtësin kuqezi, Mërgim Mavraj, ndeshja e së mërkurës është krejt tjetër histori. “E njohim Francën por do të ketë shumë ndryshime me dy takimet miqësore, – tha ai gjatë konferencës së sotme për shtyp. – Është një situatë shumë ndryshe, nuk mund të krahasohen as lojtarët dhe as ndeshjet, e për më tepër, as konteksti”.
Ndeshja e dytë e kuqezinjve në kuadër të grupit A, luhet të mërkurën duke nisur nga ora 21:00. Futbollisti 30-vjeçari mendon se takimi i së mërkurës është më i rëndësishëm se sa ai me Zvicrën, pasi për Shqipërinë është një ndeshje mbijetese. “Nëse arrijmë rezultat pozitiv do të kemi shpresa por me një humbje mund të humbasim shumë, – ka theksuar Mavraj. – Ne s’kemi asgjë për të humbur dhe do ta shijojmë maksimalisht dhe do të mundohemi që ta vendosim në vështirësi Francën sepse do të kemi rastet tona.”
Mavraj u ndal më pas gjatë konferencës për shtyp edhe te mungesa e Canës për sfidën e dytë, që do të luhet në “Velodrom”, duke shprehur bindjen se skuadra do të luajë në një nivel të lartë edhe pa kapitenin. “Ne kemi treguar edhe me Zvicrën se edhe me 10 lojtarë dhe pa Canën kishim një mbrojtje të qëndrueshme”, – ka kujtuar futbollisti i Këlnit në Bundesligën gjermane. – Edhe në të kaluarën kemi treguar se çdo lojtar është i rëndësishëm, sepse forca jonë është grupi.”
“Prandaj nuk besoj se edhe ndaj Francës do të ndihet mungesa e Lorikut, – ka këmbëngulur Mërgim Mavraj. – Nuk e di kush do luajë krah meje por vendimin e merr trajneri. Ne duhet të japim më të mirën dhe të mos mendojmë se kush luan. Cana është shumë i rëndësishëm për ne. Është një lojtar me personalitet dhe me shumë përvojë në situata të tilla por jam i bindur që do t’ia dalim ta zëvendësojmë dhe do të bëjmë një ndeshje si me Zvicrën dhe ndoshta edhe më të mirë.”
