ASNN – Zyrtarizohet miqësorja, Shqipëria sfidon Suedinë më 25 mars 2024 në Stadiumin “Friends Arena” të Stokholmit. Kombëtarja shqiptare do të luajë një ndeshje miqësore me Suedinë. Federata Shqiptare e Futbollit ka arritur akordin me Federatën Suedeze që ky takim të luhet më 25 mars 2024 në stadiumin “Friends Arena” në Stokholm të Suedisë, ndërsa orari mbetet për t’u përcaktuar.
Kjo ndeshje miqësore është në kuadër të përgatitjeve për Evropianin “Gjermani 2024”, teksa Federata Shqiptare e Futbollit është duke punuar për të zyrtarizuar edhe një miqësore tjetër për muajin mars. Sa i përket miqësores me Suedinë, kjo do të jetë hera e 6-të që dy përfaqësueset do të përballen në një ndeshje futbolli, nga të cilat shumica kanë qenë ndeshje zyrtare.
Në të kaluarën Shqipëria dhe Suedia janë përballur vetëm një herë në një ndeshje miqësore që është fituar nga kuqezinjtë me rezultatin 2-1. Ndërsa sfidat e tjera kanë qenë të vlefshme për eliminatoret e Kampionateve Botërorët, ku Suedia ka fituar 3 takime dhe një ndeshje është ndarë në barazim pa gola 0-0.
Shqipëria zhvilloi një edicion shumë të mirë eliminator dhe e mbylli në vendin e parë në Grupin E, duke siguruar pjesëmarrjen në fazën finale të “Gjermani 2024”, teksa në Evropian do të përballet me Italinë, Kroacinë dhe Spanjën.
