ASNN – Hysaj, Ajeti dhe Xhaka janë futbollistët e kombëtares shqiptare që besojnë në realizimin e ëndrrës kuqezi edhe në fazën finale të Evropianit “Francë 2016”. Për mikrofonin e televizionit shqiptar ata shprehin besimin që kanë tek kjo skuadër që është krijuar për të bërë surprizën edhe në Francë.
Elseid Hysaj është një nga futbollistët e kombëtares shqiptare që kërkon të realizojë vazhdimësinë e ëndrrës kuqezi edhe në finalet e Evropianit, Francë 2016. Mbrojtësi i kuqezinjve po shkëlqen edhe në kampionatin italian Seria A, ku ai luan me Napolin, me të cilin synon titullin “kampion”.
Edhe Arlind Ajeti, kërkon vazhdimësinë e ëndrrës kuqezi. Mbrojtësi 22-vjeçar i Kombëtares kuqezi luan me Frosinonen në Serinë A. E rëndësishme për të është të luajë sa më shumë me këtë skuadër. Taulant Xhaka, është një tjetër futbollist i Kombëtares që beson në surprizën e kuqezinjve në Francë.
Mesfushori I kuqezinjve do të luajë kundër vëllait të tij, Granitit në sfidën Shqipëri-Zvicër. Lojtarët kuqezi po vijojnë në Durrës përgatitjet për dy miqësoret e radhës me Austrinë dhe Luksemburgun.
