ASNN – Trajneri i përfaqësueses turke, Senjol Gynesh, doli sot në konferencë shtypi, ku qartësoi pozicionin e tij në krye të përfaqësueses së Turqisë, në prag të nisjes së eliminatoreve të Euro-2020, ku dueli i parë në radhë është ai ndaj Shqipërisë, takim që luhet më 22 mars 2019, në Stadiumin “Loro Boriçi” të qytetit të Shkodrës. Gynesh nuk e ka fshehur se mënyra e përzgjedhjes së tij i shkakton stres. Ai tha se e kishte pranuar ofertën e federatës turke për të drejtuar ekipin nga muaji qershor e në vijim.
Por më pas zbuloi se një nen në rregulloren e federatës e bën një trajner të Superligës turke automatikisht trajner të ekipit kombëtar turk, pa qenë nevoja të japë dorëheqjen nga skuadra që ka në kampionat dhe në rastin e Gyneshit është Beshiktashi. “Nuk më pëlqen të punoj me dy ekipe e të lë gjërat pezull, – u shpreh trajneri, – ndaj vendosa të nënshkruaj për të shkuar në kombëtare në qershor. Por nuk e dija që ishte ky rregull dhe erdhi kërkesa nga Federata.”
“Kjo e fundit nuk ka nevojë të marrë leje te klubi për ndeshjet e marsit, – ka vijuar ai. – Nuk është se tradhtova Beshiktashin, mund të gjobitemi. Edhe presidenti Erdoan më ka telefonuar, pret që të jap kontributin për vendin. I falënderoj të gjithë tifozët e futbollit, edhe ata që më përshkruajnë si një armik të Fenerbahçes. Unë adhuroj vlerat e futbollit të vërtetë dhe nuk kam asgjë kundër Fenerbahçes. Po ua them të gjithë atyre që më kanë kërcënuar.”
“Unë u thashë disa miqve të mi që pastrojnë varrezat “më bëni gati varrin”, – vijoi më tej Gyneshi. – Kam ardhur me nder, do të largohem me nder.” Gynesh kthehet të drejtojë kombëtaren turke pas shumë vitesh. Duhet thënë se ai ka pasur sukses me përfaqësuesen e vendit të tij si trajner në Botërorin e vitit 2002, ku Turqia zuri vendin e tretë dhe Brazili, me të cilin humbi në gjysmëfinale, fitoi Botërori, sepse mundi në finale Gjermaninë me rezultatin 2-0. Vetë Turqia e Gyneshit mundi Korenë e Jugut për vend të 3-të në atë Botëror.
