ASNN – Federata Shqiptare e Futbollit njofton se ka nisur shitja e biletave online, për të gjitha kategoritë për ndeshjen e parë të kuqezinjve në Ligën e Kombeve, Shqipëri-Izrael. Kjo ndeshje do të luhet në datën 7 shtator 2018, në orën 20:45, në stadiumin “Elbasan Arena”.
Çmimet e biletave variojnë nga 1,000 lekë për biletat e thjeshta deri 18,000 lekë biletat VIP. Kështu, organizmi që qeveris futbollin në vend ka njoftuar sot se ka nisur në Internet, shitja e biletave për sfidën Shqipëri-Izrael, e programuar për në javën e parë të shtatorit.
Në faqen e FSHF-së janë publikuar edhe çmimet e biletave, që duket se janë vërtetë të “kripura”, duke parë kundërshtarin e kuqezinjve. Sfida do të luhet në “Elbasan Arena” dhe do të jetë e para e Shqipërisë në Ligën e Kombeve.
