ASNN – Prezantohet fanela e re e kombëtares dhe bashkë me të edhe sponsori prej disa milionë eurosh. Nga të paveshur, në një fanellë që vlen miliona euro. Ky është transformimi i ekipit kombëtar shqiptar që prezantoi fanelën e tij të re, 23 vjet pasi luajti me uniforma blu, të dhëna për mëshirë nga Danimarka në Kopenhagen, edhe për shkak të një ngatërrese teknike, ku Shqipëria kishte shkuar atje me një set të vetëm uniformash, të kuqe, siç i kishin edhe nordikët vendas.
Sidoqoftë, jemi në 2016-ën dhe, e dizenjuar nga një agjenci shqiptare, (PINK. Creative), fanella e re u paraqit para mediave dhe publikut, me një krenari të dukshme. Përfaqësuesja do të ketë në dispozicion tri të tilla, me ngjyrën tradicionale të kuqe, si dhe të zezë dhe të bardhë. Ajo është veshja e fundit e kombëtares, pas shumë tjerave që kanë hyrë tashmë në histori. Varianti fitues u përzgjodh nga një numër i madh, prej rreth 70 dizenjosh të tjera.
Përfaqësuesi i agjencisë, Alban Fejzo, shpjegoi se në çfarë mënyrë u ideua kjo fanellë e re. Në të njëjtën ceremoni u prezantua edhe sponsori i ri i kombëtares, për një periudhë 5-vjeçare, kompania italiane “Makron”, e cila edhe do ta prodhojë uniformën e re. Fillimisht, italianët sqaruan se çfarë përfaqëson sipërmarrja e tyre, e njohur në Evropë dhe në botë. Sipas tyre, ajo pajis me uniforma klube të ndryshëm futbolli në Itali, Angli, Francë, Spanjë, Rusi, Hungari, Kroaci, Bullgari, Kili e Shtetet e Bashkuara të Amerikës.
Po ashtu, edhe përfaqësuesen e regbisë së Skocisë, një nga më historiket në botë. Në Tiranë për të firmosur kontratën kishte ardhur drejtori ekzekutiv i Makronit, Xhanluka Pavanelo. Nuk jepet shifër zyrtare të vlerës financiare të kontratës, por siç u pohua nga njerëz të Federatës, ajo shkon në miliona euro, dhe është padyshim marrëveshja më fitimprurëse e futbollit shqiptar për të gjitha kohët. Jozyrtarisht, besohet se bëhet fjalë për 5 milionë euro për 5 vjet, nga 2016-ta deri në 2021.
