ASNN – Francezët kanë braktisur kryeqytetin e tyre, Parisin, për të luajtur në provincë. Por futbollistët e “Bluve” i pret një atmosferë e zjarrtë në një stadium ku kombëtarja ka shkelur shumë pak herë në historinë e saj. Trajneri Deshamp kërkon fitore, ndonëse Shqipërinë e vlerëson.
“Përveç fitores në Portugali, pjesa e parë e Shqipërisë në Serbi ishte cilësore, – ka pohuar trajneri i galëve. – Shqipëria bën pjesë, padyshim, tek skuadrat e mira. Mjafton të shikosh përbërjen e saj. Lojtarët luajnë në klube mjaft të njohur, shumë prej tyre në Itali apo Zvicër.”
“Shqipëria ka pësuar vetëm 3 gola në 7 ndeshjet e fundit, – ka vijuar ish-futbollisti i famshëm francez, ish-kampion bote dhe Evrope me Francën, duke folur para ndeshjes me Shqipërinë. – Veçse, ne kërkojmë ta fitojmë ndeshjen, ashtu si gjithmonë. Këtë vit kemi humbur vetëm ndaj Gjermanisë.”
Kombëtarja shqiptare është ndeshur katër herë me Francën, deri tani. Francezët i kanë fituar të gjitha përballjet që kanë qenë për Eliminatoret e Kampionatit Evropian. Herën e fundit, në dy duelet e vjeshtës së 2011-tës, ka fituar me rezultatet 2-1 në Tiranë dhe 3-0 në Paris.
