ASNN – Kur kanë mbetur edhe 4 ditë nga përballja sportive midis Shqipërisë dhe Serbisë në “Elbasan Arena”, trajneri i Kombëtares shqiptare, Xhovani De Biazi, ka publikuar listën e lojtarëve të grumbulluar për ndeshjen vendimtare për ëndrrën “Francë 2016”. Drejtuesi i Kombëtares deklaroi se askush nuk duhet të përfshihet nga euforia ndaj ekipit serb, ajo që i intereson si kuqezinjve, por edhe Shqipërisë është rezultati, dhe ai do të luajë për fitore.
Lista e 26 lojtarëve që janë grumbulluar për dy ndeshjet e fundit të Eliminatoreve, ndaj Serbisë dhe Armenisë, është publikuar nga trajneri i Kombëtares shqiptare, Xhovani De Biazi. Në një konferencë për shtyp mbajtur të shtunën në mjediset e Federatës Shqiptare të Futbollit në kryeqytet, trajneri italian me pasaportë shqiptare theksoi se në fushë do të luajnë ato lojtarë që kanë gjendjen më të mirë fizike. De Biazi theksoi se koha në dispozicion për t’u stërvitur është e kufizuar.
Dhe duke e ndalur te ndeshje e parë ajo me Serbinë, 59-vjeçari De Biazi sqaroi se nuk e ka frike përfaqësuesen serbe, por Shqipëria duhet të bëjë një lojë të kujdesshme dhe inteligjente. “Nuk e kam frikë Serbinë, – ka thënë ai. – Ndeshja me Serbinë për ne është e rëndësishme vetëm për rezultatin dhe asgjë tjetër. Të gjithë e presim ndeshjen me Serbinë, jemi të karikuar, pasi është e rëndësishme dhe vendimtare dhe për mua nuk ka rëndësi e kaluara, unë mendoj vetëm për të tashmen.”
“Nuk duhet që të përfshihemi nga euforia ndaj Serbisë, duhet të jemi të përqendruar deri në fishkëllimën e fundit të gjyqtarit, pasi mund ta pësojmë”, – ka kujtuar ai. Ndërsa përsa i përket listës dhe rikthimit të Alban Mehës, De biazi theksoi se futbollisti i Konjasporit është rikthyer pasi po kalon një periudhë shumë të mirë dhe është gati për të dhënë maksimumin. Ndeshja mes Shqipërisë dhe Serbisë do të luhet të enjten në mbrëmje, duke nisur nga ora 20:45, në Stadiumin “Elbasan Arena”.
Ja lista e De Biazit:
- E. Berisha
- A. Hoxha
- O. Shehi
- A. Agolli
- A. Ajeti
- N. Aliji
- L. Cana
- B. Gjimshiti
- E. Hysaj
- A. Lila
- A. Rrahmani
- A. Abrashi
- M. Basha
- E. Kaçe
- B. Kukeli
- L. Memushaj
- H. Shala
- T. Xhaka
- B. Balaj
- S. Cikalleshi
- Sh. Gashi
- E. Lenjani
- O. Roshi
- A. Sadiku
- H. Salihi
- A. Meha
