ASNN – Të premten e 24 marsit 2017, në Stadiumin “Renzo Barbera” të Palermos, Shqipëria do të përballet me Italinë, në një ndeshje të vlefshme për grupin G të Eliminatoreve të Botërorit “Rusi 2018”. Trajneri i kuqezinjve, Xhovani De Biazi, i pranishëm në Asamblenë Vjetore të Federatës Shqiptare të Futbollit, ka folur për mediat italiane duke për këtë sfidë. Ai ka vlerësuar Berishën dhe Hysajn si lojtarë të momentit. Ndërsa ka thënë se Ventura ka një ekip tepër cilësor.
Kur kanë mbetur edhe 9 ditë përpara sfidës me Italinë, e vlefshme për grupin G të Eliminatoreve të Botërorit “Rusi 2018”, trajneri i kombëtares kuqezi, Xhovani De Biazi ka folur për “La Tribuna di Trevizo”. Italia vjen në sfidën me Shqipërinë si kryesuese e grupit me 10 pikë, po aq sa edhe Spanja, ndërsa kuqezinjtë 6. Por përtej kësaj renditjeje, në mediat vendase, trajneri i Italisë, Ventura ka thënë se i trembet ndeshjes me Shqipërinë.
“S’ka mundësi, – përgjigjet De Biazi. – Ai është favorit pasi ka në formacion lojtarë të rinj e të talentuar si Beloti e Imobile. Më pas është blloku i mbrojtjes së Juventusit, që garanton siguri. Pa harruar Romanjolin apo Kaldaran. Ventura s’ka çfarë të kërkojë më shumë, vetëm të marrë lojtarë nga Marsi.” I pyetur se cili nga lojtarët shqiptarë që luajnë në kampionatin italian, po shkëlqen më shumë, De Biazi përgjigjet: “Të gjithë po bëjnë më të mirën”.
“Por më mirë po luan Berisha, që ka marrë rolin e titullarit me Atalantën, – ka vijuar ai. -Pa harruar edhe Hysajn që po bën një sezon të jashtëzakonshëm”. Gjatë intervistës, De Biazi është pyetur edhe për një ofertë për të drejtuar një skuadër në kampionatin italian. “Po më ka marrë Zamparini, por e refuzova me mirësjellje, – ka thënë De Biazi. – Për momentin jam mirë me Shqipërinë teksa kam transmetuar edhe një mesazh. Nuk jam këtu për para, por për të krijuar një mendësi ndryshe.”
“Pasi unë besoj me të vërtetë se mund të fitoj. Dhe kjo është thelbësore. Unë vërtet nuk kam lojtarë cilësorë siç i ka Italia, por secili përdor në fushë mënyrat e veta më të mira. Do të bëjmë një ndeshje të bukur në Palermo”, – ka përfunduar trajneri i Kombëtares kuqezi, Xhovani De Biazi, duke folur për “La Tribuna di Trevizo”.
