ASNN – Ndërkohë pritet që në Kopenhagen të jenë mbi 10 mijë shqiptarë. Në fakt pritej ky numër i lartë, pasi Shqipëria gjatë këtyre kualifikueseve ka pasur një ecuri të shkëlqyer, ndaj dhe tifozeria është më e zjarrtë. Takimi do zhvillohet në stadiumin “Parken Sport”, me një kapacitet prej 38,065 vendesh. Në fillim u caktua një numër prej 2,500 biletash për tifozët kuqezinj, por ky numër u ezaurua në kohë rekord.

Kjo bëri që të ketë edhe shumë kërkesa të tjera dhe numri i biletave të shitura për mbështetësit e Kombëtares kuqezi i kaloi 5 mijë. Në një situatë të tillë, drejtuesit e policisë daneze dhe të federatës vendëse kanë pasur disa takime kohët e fundit për të marrë masa mbi sigurinë dhe, mbi të gjitha, për të gjetur një mundësi që shpërndarja e tifozëve në stadium të jetë në atë formë, që evitimi i problemeve të jetë më i lehtë.

Gjithsesi, burime pranë Federatës Shqiptare të Futbollit bëjnë me dije se numri i tifozëve të përfaqësueses sonë i ka kaluar 10 mijë dhe sa vjen edhe shtohet. Nuk dihet ende se si do veprohet me numrin e lartë të kërkesave nga tifozët shqiptarë, pasi numri në stadium për skuadrën mike është i reduktuar. Përfaqësuesja kuqezi do të luajë dy finale muajin e ardhshëm, përballë rivalëve direkt në renditje.