ASNN – Ndeshja Ukrainë-Shqipëri do të zhvillohet të dielën, në Evian të Francës, dhe do të sillet për sportdashësit drejtpërdrejt nga Rrjeti i Radio-Televizionit Shqiptar, duke nisur nga ora 16:00. Dhe portieri Etrit Berisha, i pranishëm në konferencë krahas Panuçit, ka kërkuar nga lojtarët e rinj që të marrin më tepër përgjegjësi. “Normalisht që është përgjegjësi, si për mua, por edhe për të gjithë të tjerët që vijnë këtu”, – ka thënë ai.

“Kombëtarja është diçka e shenjtë dhe të gjithë ne mundohemi të bëjmë detyrën tonë në mënyrën sa më të mirë të mundshme, – ka vijuar gardiani kuqezi. – Duhet që edhe të rinjtë ta ndjejnë fanellën po njësoj dhe më pas do të jemi edhe më mirë. Me Kosovën ndodhi ajo që ndodhi, por të dielën do të jetë një test edhe më i rëndësishëm për ne. Në dy ndeshjet e fundit kemi pasur probleme si me lojë, ashtu edhe me rezultat.”

“Ndërsa të dielën do të provojmë të tregojmë se kemi cilësi, – ka thënë Berisha. – Me Kosovën nuk u futëm në lojë ashtu si duhet, përballë një kundërshtari që kishte një dëshirë të jashtëzakonshme për të bërë mirë. Sidoqoftë, unë besoj se Shqipëria ka një grup cilësor, që mund ta çojë kombëtaren në Kampionatin Evropian.” Portieri i Kombëtares nuk e ka mohuar klimën që u krijua në ekip pas humbjes me Kosovën.

“Pas ndeshjes të gjithë ishin të zhgënjyer me atë paraqitje, – ka thënë ai. – Pasi pamë lojën përsëritje, pamë se të gjithë mund të bënim më shumë në momente të caktuara. Të gjithë ishim dakord që nuk ishim paraqitur mirë dhe me siguri që do të ndryshojmë këtë që në ndeshjen me Ukrainën. Ne jemi profesionistë dhe mendojmë të japim më të mirën, pasi kjo është e vetmja mënyrë për t’i shërbyer ekipit.”