ASNN – Kombëtarja ndeshet të dielën me Armeninë dhe, nën drejtimin e trajnerit Xhovani De Biazi, kuqezinjtë kanë nisur përgatitjet për këtë takim në kampin e tyre stërvitor në Durrës. Në konferencën e përditshme për shtyp kanë dalë të martën futbollistët Andi Lila dhe Naser Aliji.
Në vijim të përgatitjeve për ndeshjes me Armeninë, Kombëtarja kuqezi ka nisur programin stërvitor në Durrës dhe në konferencën e përditshme për shtyp kanë dalë futbollistët Andi Lila dhe Naser Aliji. Për Lilën, kjo ndeshje mbart edhe një ngarkesë më të madhe emocionale për arsye familjare.
Mbrojtësi kavajas Andi Lila shprehet se fitorja e së dielës do t’i rriste shpresat e kuqezinjve për kualifikimin e parë në fazën finale të një Evropiani. “Kemi respekt maksimal për Armeninë, sepse fitorja si me Armeninë edhe me Danimarkën apo Portugalinë vlen tri pikë”, – ka deklaruar ai.
“Nëse fitojmë, vazhdimësia jonë në këto eliminatore do të jetë fantastike”, – shtoi Lila. Ndërsa Aliji ka pohon emocionet e debutimit me Kombëtaren kuqezi. “Ndihem shumë krenar që jam pjesë e kombëtares edhe pse përfaqësoj Iliridën, – ka thënë ai. – Këtu më kanë pritur shumë mirë dhe ndihem si në shtëpinë time.”
“Kam folur me Alban Bushin dhe Paolo Tramexanin, të cilët më kanë shpjeguar sesi është situata në kombëtaren shqiptare”, – ka shtuar ai. Një nga prurjet e reja të De Biazit për këtë ndeshje, Naser Aliji, deklaron se është pritur mirë nga stafi dhe lojtarët e kombëtares.
Konkurrenca në repartin e mbrojtjes është e madhe, por kjo gjë nuk e frikëson 21-vjeçarin, i cili është i gatshëm që të japë maksimumin për fanelën kuqezi. “Të gjithë e dimë se sa futbollist i mirë është Ansi Agolli në krahun e majtë të mbrojtjes, gjithsesi unë do të jap maksimumin në stërvitje për të qenë i gatshëm në çdo moment për të dhënë kontribut për ngjyrat kuqezi”, – theksoi Aliji.
Ndeshja Shqipëri-Armeni luhet të dielën, duke nisur nga 18:00 në Elbasan “Arena” dhe do të sillet për sportdashësit drejtpërdrejt nga Rrjeti i Radio-Televizionit Shqiptar.
