ASNN – 4 të “plagosurit” e Kombëtares shqetësojnë Panuçin, “bilanc lufte” në radhët e kuqezinjve. Disa dëmtime radhazi të lojtarëve të Kombëtares kanë sjellë shqetësim tek stafi i skuadrës kuqezi, me në krye Kristian Panuçin. Bëhet fjalë për mbrojtësin Mërgim Mavraj që theu dorën ditën e martë tek Ingolshtadti. Mbrojtësi ka gjasa të mungojë disa javë e të humbasë formën e tij të mirë sportive, duke vënë në siklet Panuçin për qendërmbrojtës.
Një tjetër lojtar i dëmtuar është Rei Manaj, i cili theu hundën tek Albasete në duelin kundër Granadës. Me maskë në fytyrë ai është kthyer në stërvitje, por dyshimet janë që Manaj të mos jetë plotësisht në formë për të luajtur në nivele të larta, për më tepër në ndeshjet e rëndësishme kualifikuese të kampionatit Evropian, ku Kombëtares i duhen goledadorë të mirëfilltë dhe lojtarë në formë maksimale sportive. Një tjetër dëmtim serioz dhe me peshë në Kombëtare është ai i sulmuesit të krahut, Eroz Grezda.
Ai ka dëmtuar këmbën e majtë dhe ka gjasa të mungojë dy muaj, ku vihet në rrezik edhe prania në përfaqësuese. Edhe po të kthehej në kohë, Grezdës do t’i duhej shumë punë për të rikapur formën e tij optimale. Futbollisti nga Kosova është një zgjedhje e përhershme e Panuçit dhe nuk dihet si do të veprojë trajneri nëse ai do të mungojë në duelin e parë me Turqinë në muajin mars. Një tjetër shqetësim është dhe ai i Ledian memushajt, i cili ka pësuar një dëmtim të lehtë dhe stërvitet i diferencuar tek Peskara.
Nuk bëhet fjalë për dëmtim të rëndë, por kjo mund të kushtëzojë formën sportive të mesfushorit vlonjat, gjë që mund të ketë ndikim negativ në Kombëtare. Duke marrë parasysh edhe faktin që Odise Roshi ende nuk është kthyer në fushë dhe nuk mund të jetë gati, shkon në 5 numri i lojtarëve titullarë që nuk do të jenë të gatshëm për Kristian Panuçin në duelin e parë eliminator të Evropianit të ardhshëm, atë ndaj Turqisë, takim që luhet në Elbasan në muajin mars.
