Vështirësia më e madhe e Federatave Sportive, të paktën sipas asaj që kanë ngritur në mbledhje përfaqësuesit e Qitjes dhe të Çiklizmit, janë buxhetet. Sepse vërtetë mund të planifikohet që tani pjesëmarrja në “Tarragona 2017”, por varet se sa mund të japë buxhet financiar Ministria e Arsimit dhe Sportit. Aq më tepër që çiklizmi, jo vetëm për shkak të përgatitjes, por dhe të bazës materiale, apo dhe qitja kanë specifika të tjera në krahasim me sportet pjesëmarrëse në Olimpiadë.

Por jo vetëm kaq, vështirësi për të marrë pjesë në Lojërat Mesdhetare “Tarragona 2017”, të paktën në këtë moment, paraqet dhe basketboll, pavarësisht se do të jetë “street-ball”-i si disiplinë, që ka një numër më të vogël sportistësh. Sepse, të paktën sipas burimeve të sigurta që vijnë nga Federata Shqiptare e Basketbollit, Eliminatoret e Botërorit për ekipin e meshkujve janë afruar nga nëntori 2017 në gusht 2017.

Jo vetëm kaq, por duke qenë se konfirmimi për pjesëmarrje do të jetë në 18 nëntor të këtij viti, basketbolli përllogarit dhe pjesëmarrjen e të gjitha skuadrave të moshave në Kampionatet Evropiane. Po kështu janë dhe disiplinat e tjera, mbi të gjitha peshëngritja e cila do të përgatitet për 2017-ën për organizimin e Kampionatit Evropian të të rinjve dhe Nën-23-vjeçarëve në Tiranë, që do të mbahet nga data 22 nëntor, deri më 2 dhjetor 2016.

E parë kështu kur të gjithë Federatat tashmë do të jenë dhe në proces zgjedhor, përtej kërkesës së KOKSH për t’u përgatitur që tani për “Tarragona 2017”, vështirësitë ekzistojnë. E vetmja zgjidhje do të jetë buxhet ekstra nga Ministria e Arsimit dhe Sportit, përfaqësuesit e të cilit nuk kanë qenë në mbledhje, që të mos bjerë barrë e rëndë për atë që do të jepet gjatë gjithë vitit. Sepse një pjesëmarrje në “Tarragona 2017” do të thotë një veprimtari ndërkombëtare më pak për të gjithë…