ASNN – Vijon sot radha e analizave vjetore nëpër Federata, teksa bëhet fjalë për Asambletë e Përgjithshme. Kështu pas atletikës dhe çiklizmit, është radha e xhudos dhe e karatesë për t’i bërë këtë asamble, të cilat do të zhvillohen në mjediset e ish-Kompleksit “Dinamo”.
Sigurisht që do të kenë dhe monitorimin e Ministrisë së Arsimit, Sportit dhe Rinisë përmes shefit të politikave dhe strategjive në këtë dikaster Arjan Konomit, por dhe të Komitetit Olimpik Kombëtar Shqiptar, pavarësisht se ky i fundit në mesditë do të ketë takimin e përbashkët me Komitetin Olimpik të Kosovës.
Për hir të së vërtetës duhet pranuar se xhudo dhe karateja kanë pasur arritje në këtë vit 2017, sidomos në arenën ballkanike. Ndaj dhe kanë se çfarë të analizojnë dhe të vendosin piketa për vitin e ardhshëm e ngarkuar me veprimtari kombëtare dhe ndërkombëtare.
