ASNN – Kur kanë mbetur diçka më tepër se 6 muaj deri në nisjen e Lojërave Olimpike “Rio 2016”, ende nuk është i qartë numri i sportistëve që do të përfaqësojnë Shqipërinë në festivalin më të madh sportiv në planet. Deri më tani, ajo që dihet është se Luiza Gega në atletikë dhe Sidni Hoxha në not janë dy shqiptarët e parë të kualifikuar me normë për në Olimpiadën e vitit të ardhshëm.

Luiza Gega në atletikë dhe Sidni Hoxha në not janë dy shqiptarët e parë të kualifikuar me normë për në Lojërat Olimpike “Rio de Zhaneiro 2016”. Këtë e ka konfirmuar me anë të linjës telefonike për AlbanianSport.com zëvendëspresidenti i Komitetit Olimpik Kombëtar Shqiptar (KOKSH), Gjergji Ruli, i cili është njëkohësisht kryetar i komisionit teknik në organizmit që qeveris olimpizmin shqiptar dhe presidenti i Federatës Shqiptare të Atletikës.

Sipas Rulit, Gega e ka realizuar katër herë gjatë vitit normën A të kualifikimit për në Lojërat Olimpike “Rio de Zhaneiro 2016”. Nuk duhet harruar se ajo kohën e saj më të mirë të vitit e ka 4’02”63, e cila është dhe rekord kombëtar, që u thye në Kinë. Por në të njëjtën kohë edhe duke qenë pjesëmarrëse në Lojërat e Para olimpike Evropiane në Baku, apo në Botërorin e Kazanit, si dhe në Ballkaniadë, Gega gjithnjë ka ardhur me rezultate të barasvlershme normë kualifikimi për në “Rio 2016” në 1500 metra.

“Po kështu, – ka thënë Ruli, – edhe Sidni Hoxha në not ka arritur në Botërorin e Kazanit normën B. Këto dy sportistë janë të sigurtë që do të jenë pjesëtarët e Shqipërisë në Lojërat Olimpike “Rio de Zhaneiro 2016”.